နော်ဂျား၊ ဇန်နဝါရီ ၂၁ ရက်၊ မူဆယ်
စစ်ကောင်စီထိန်းချုပ်တဲ့ ရှမ်းမြောက်က နယ်စပ်မြို့ဖြစ်တဲ့ မူဆယ်မြို့မှာ လာမယ့် ဖေဖော်ဝါရီလ ၁ ရက်နေ့ကစပြီး လက်လီလက်ကားရနိုင်မယ့် မူးယစ်ဆေးဝါးဆိုင် (၂၃) ဆိုင် ဖွင့်လှစ်မယ်လို့ ရွှေဖီမြေက စုံစမ်းသိရှိရပါတယ်။
မူဆယ်မြို့ပေါ်က ရပ်ကွက် ၉ ခုမှာ လိုင်းကြေးပေးကာ ဖွင့်လှစ်သွားမှာဖြစ်ပြီး ရာမ၊ ice, K, HappyWater နဲ့ ဆေးခြောက် အစရှိတဲ့ မူးယစ်ဆေးဝါးအမျိုးမျိုးကို ရောင်းချမှာ ဖြစ်ပါတယ်။
ဂိမ်းရုံပိုင်ရှင်တွေ၊ ပြည်သူ့စစ်တွေနဲ့ တရုတ်လူမျိုးတွေက ပြီးခဲ့တဲ့ ဇန်နဝါရီ (၁၉) ရက်မှာ ရောင်းချခွင့် တောင်းဆိုလာတာကြောင့် စခန်းမှူး ဒုရဲမှူး နေယုဆန်းနဲ့ နယ်ထိန်းခေါင်းဆောင် ရဲအုပ်ရဲနောင်တို့ရဲ့ ခွင့်ပြုချက်နဲ့ ဖွင့်လှစ်မှာဖြစ်ကြောင်း ရဲသတင်းရင်းမြစ်တွေထံမှ သိရပါတယ်။
ဖေဖော်ဝါရီလ (၁) ရက်နေ့ကစပြီး ဂိမ်းရုံ၊ ပြည့်တန်ဆာ၊ အနှိပ်ခန်းတို့မှာ တွဲဖက် ရောင်းချသွားမှာဖြစ်ကြောင်း ရဲသတင်းရင်းမြစ်တွေက ပြောပါတယ်။
“(ဒန)ကိုအောင်ကျော်ဦးက ခွင့်မပြုဖို့ပြောတယ်။ CID, SB, နယ်ထိန်း, ရဲကင်းမှူးတွေနဲ့ စခန်းမှူးက လုပ်ချင်တယ်။ အဲမှာ နယ်ထိန်းခေါင်းဆောင်ရဲနောင်က ခင်ဗျားတို့ ကျနော်တို့ ဒီနေရာမှာ မြဲမယ်ထင်လို့လား ကျနော်တို့လက်ထဲ အာဏာရှိနေတဲ့အချိန်မှာ ငွေရှာရမှာလို့ ပြောတယ်။ နောက်ဆုံးတော့ ဖွင့်ဖြစ်သွားတယ်။ အထူးမူးယစ်ကို သီးသန့်ပေးရမယ်တဲ့။ အခု(၂၃)ဆိုင်ကို တစ်လသိန်း(၅၀)ကောက်မယ်။ ရာထူးကြီးငယ် ခွဲစားမယ်လို့ ရဲနောင်က ပြောတယ်။ ရဲနောင်လုပ်နေတာ သူက ဆရာကြီး” ဆိုပြီး အမည်မဖော်လိုတဲ့ နမ့်ခမ်းမြို့မ ပြည်သူ့စစ်တစ်ဦးက ရွှေဖီမြေကို ပြောပါတယ်။
ဖော်ပြပါ မူးယစ်ဆေးဝါး လက်လီအရောင်းဆိုင် ဖွင့်လှစ်မယ့် ကိစ္စနဲ့ ပတ်သက်ပြီး ရဲချုပ်နဲ့ ပြည်နယ်ရဲတပ်ဖွဲ့မှူးကို တင်ပြသွားမှာဖြစ်ကြောင်းကိုလည်း စခန်းမှူးက အဆိုပါ တွေ့ဆုံပွဲမှာ ပြောကြားခဲ့တယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
