လွေးထွေး၊ ဇန်နဝါရီ ၁၄ ရက်၊ မူဆယ်
ရှမ်းမြောက် စစ်ကောင်စီတပ် ထိန်းချုပ်ထားတဲ့ တရုတ်-မြန်မာနယ်စပ် မူဆယ်မြို့မှာ ဆိုင်ကယ်စီးတဲ့ အမျိုးသားတစ်ဦးက ဆိုင်ကယ်လုခံရတဲ့အပြင် ရိုက်နှက်ခံခဲ့ရတယ်လို့ ဒေသခံအမျိုးသားရဲ့ ပြောပြချက်အရ သိရပါတယ်။
ပြီးခဲ့တဲ့ ဇန်နဝါရီ ၁၂ ရက် မနက် ၅ နာရီဝန်းကျင်မှာ မူဆယ်မြို့ ဟိုနားရပ်ကွက်မှာ ဆိုင်ကယ်စီးလာတဲ့ အသက် ၂၀ ကျော်အရွယ် အမျိုးသားကို အသက် ၃၀ ဝန်းကျင်အရွယ် အမျိုးသား ၂ ဦးက ဦးခေါင်းနဲ့ လက်မောင်းကို ရိုက်နှက်ပြီး ဆိုင်ကယ်လုယူသွားတာ ဖြစ်ပါတယ်။
မူဆယ်မြို့ရှိ အမျိုးသားတစ်ဦးက “လက်ရော၊ လည်ပင်းရော၊ ခေါင်းရော အကုန်အရိုက်ခံရတယ်။ မနက်အစောကြီးဆိုတော့ ဘယ်သူမှလည်း သိပ်မရှိတော့ ကူတဲ့သူလည်း မရှိဘူး” လို့ ပြောပါတယ်။
၎င်းရိုက်နှက်ခံရသူ မိသားစုဝင်တွေက သက်ဆိုင်ရာကို တိုင်ကြားထားပေမဲ့ သက်ဆိုင်ရာက တာဝန်ယူလုပ်ဆောင်တာ မရှိသေးဘူးလို့ သိရပါတယ်။
အလားတူ ဇန်နဝါရီ ၁၀ ရက်ကလည်း မူဆယ်မြို့ပေါ်က Nut Garden အနီးမှာ ကားတစ်စီး အခိုးခံခဲ့ရကြောင်း ဒေသခံတွေက ဆိုပါတယ်။
စစ်ကောင်စီတပ် ထိန်းချုပ်ထားတဲ့ မူဆယ်မြို့မှာ ပြည်သူ့စစ်တွေ များတဲ့အပြင် လောင်းကစားဝိုင်းနဲ့ မူးယစ်ဆေးဝါးလည်း အလွယ်တကူရနေတာကြောင့် မကြာခဏ ခိုးမှု၊ လုယက်မှုတွေ ရှိနေပြီး သက်ဆိုင်ရာက တာဝန်ယူလုပ်ဆောင်ပေးတာ မရှိဘူးလို့ ဒေသခံတွေဆီက သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
