လိုည်းလာဝ်ဇာရ်၊ ဒီဆဲမ်ဘာ ဆငည်း 18၊ လာဆေဝ်
ကူန်မာကောန်ကျောင်ကဲ က္လာင်းတဖုင်ဆျှိုည်ဖီမျေကဲဒါႈ ဒီပ်ုန်ႎီရ်ထိင်ခြဲ တံပ်ကညာအာဏာဆီုက်ဇေဝ်ကဲ ပကပီုန်ဆျှံမ်ကဒါႇပိူည် ခေဲင်ကီုင်းလာဆေဝ်နီန် ကနာည်နံင်ဟံပ်ကဲဆိုလာ ခေဲင်ကျောင်အထက (2)နီန် ကဲအီရံပ်ဇီုင်းကပ္လိူင်ခေဲင်ကျောင်ကဲ မှာန်းဟာဝ်းရိူန်းတကောန်ကျောင်ကဲ အူအီးနီန် 2 မှီုန်အောႏ။
ကဲဒါႈ ခေဲင်ဂါင်အူဂါင်ဒီန် ဘိူည်မိူဝ်ႈကောန်ကျောင်အီဟိုက်ကျောင် အာရ်အီးအိုည်အီးမာ် ဂေါႇမိုႈကဲကံပ်ဒိုည်ႇနီန် ကူန်မာကောန်ကျောင်ကဲဒါႈ အ်ုန်ကီန်းဒည်းခည်းအောႏ။
ကူန်မာကောန်ကျောင်အူအီး က္လာင်းဒါႈ” ပကျောင်အထက 2 လာဆေဝ်နီန် ယာအူပ်ကျောင်ကဲ ကံပ်ဟာဝ်းရိူန်းတကောန်ကျောင်နီန်အူအီး အာရ်မှီုန်။ ကဲဒါႈ ကနာည်နံင်ဟံပ်ဆိုလာခေဲင်ကျောင် အူဂါင်ဒီန် ဘိူည်မိူဝ်ႈ ကောန်ကျောင်အာရ်အီးအိုည်အီးမာ် ကဲဆူည်ႇဒိုႇအယ်ဟံပ်ဒိုည်ႇ။ ကူန်မာကောန်ကျောင်ကဲ ဘိူည်ဟြာင်းပျမာ် အာဝ်ဘိူန်း။ ပဂါင်အ်ုန်အီမိူဝ်ႈအူအီးဒိူန် အာရ်မှီုန်ဒီန်အ်ုန်ဘိူန်းအေ့။ ဆာ်မိုႈအာရ်အီးဒီန် ဖိုန်းမှီုန် အိုည်အီးဟည်မိုႈ 6 မှီုန် ကူန်မာကောန်ကျောင်အီအာဝ်မိူဝ်ႈဒိူန် အ်ုန်ကီန်းဒည်းကနာည်ကဲ”
ဘိူန်းအယ်နံပ် တောပ်ဘည်က္လာင်း တိုအီးအရာပ်ကဲအူအီးဒါႈဘိုး ကောန်ကျောင်ကဲအီဟိုက်ကျောင် အထက 2 ဒီန်တောန်အီး တောပ်ပည်ချှံန်မူလ ရောတ်ချှံန်ဇာရ်နီန် အ်ုန်လိုဒိုည်ႇဒဲႈ ရိူန်းပ်ုန်ကံပ်ကဲတောန်အီးအောႏ။
ကဲဒါႈ “ကဲအာဝ်ကကာ်ႈစိ။ ကောန်ကျောင်ကဲအီဟိုက်ကျောင်ဒီန် အူအီးအာဝ်ကီုက်လိုဒိုႇဒဲႈဒိုည်ႇ။ ကနာည်ပ္လေါည်စုင်စုင်လာလာင်ကဲမာ် လိုဒိုႇဟံပ် အူအီးအူမှီုန်။ ကနာည်နံင်ဟံပ်ဆိုလာဒီန်မာ် ကဲဟည်ကံပ်ဘိုးရိူန်း”။
ဂေါႇပ်ုန်လီပ်ကမိုန်ဒဲႈခယ်ကဲ တံပ်ကိုကာင် MNDAA ကဲ ႎီရ်အာပ်ဒဲႈကီုင်းလာဆေဝ် ပ်ုန်ထိင်ခြဲကဲတ တံပ်ကညာအာဏာဆီုက်ဇေဝ်ကဲ ခည်ကျံရ်အေပ်ြုရ်ဒိူန်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
