လွေးထွေး၊ ဒီဇင်ဘာ ၁၂ ရက်၊ ပြင်ဦးလွင်
မန္တလေးတိုင်း ပြင်ဦးလွင်မြို့ထဲ ဝင်လာတဲ့ လူထုတချို့ကို စစ်ကောင်စီတပ်က ပြင်ဦးလွင်နဲ့ မန္တလေးကြားက ဇီးပင်ကြီးဂိတ်မှာ မှတ်ပုံတင် ထားခိုင်းပြီး မထားရင် ငွေကျပ် ၃ သောင်း ပေးဆောင်ခိုင်းတယ်လို့ ကိုယ်တိုင်ကြုံတွေ့ခဲ့ရသူ အမျိုးသမီးရဲ့ ပြောပြချက်အရ သိရပါတယ်။
ဒီဇင်ဘာ ပထမအပတ်ကတည်းကနေ ဒီနေ့ ဒီဇင်ဘာ ၁၂ ရက်အထိ ပြင်ဦးလွင်မြို့က ပန်းပွဲတော်ကို အလည်အပတ်လာသူ များပြားပြီး လာရောက်လည်ပတ်သူတွေကို စစ်ကောင်စီတပ်က ၎င်းတို့ရဲ့ ဇီးပင်ကြီးဂိတ်မှာ မှတ်ပုံတင်ထားခဲ့ဖို့ပြောတာနဲ့ ငွေတောင်းတာတွေလုပ်ခဲ့တယ်လို့ ဆိုပါတယ်။
ကိုယ်တိုင်ကြုံခဲ့ရသူ အမျိုးသမီးက “ကျမနဲ့သူငယ်ချင်းက ပန်းပွဲတော်လာလည်တာ။ အဲဂိတ်က စစ်သားက မှတ်ပုံတင်ထားခဲ့ရမယ်တဲ့။ အရှေ့မှာ မှတ်ပုံတင်စစ်လို့ ပြစရာမရှိရင်ရော ဘယ်လိုလုပ်မလဲလို့။ နေ့ချင်းပြန်ဘဲလာတာ မပေးလို့ရော ရလားလို့။ မပေးရင် ၃ သောင်းတဲ့။ ပိုက်ဆံမပေးရင် နေခဲ့တဲ့။ အဲလို အော်ပြောတာ” လို့ ပြောပါတယ်။
မှတ်ပုံတင်ပေးချိန်မှာ လာတဲ့မြိုနဲ့ မျဉ်းစောင်းတွေပါ မေးမြန်းပြီး ၁၃ မျဉ်းစောင်း၊ ၅ မျဉ်းစောင်းနဲ့ ၉ မျဉ်းစောင်းဆိုရင် ငွေပိုတောင်းပြီး အစစ်အဆေးပိုကြာတာကိုလည်း တွေ့ခဲ့ရကြောင်း အထက်ပါအမျိုးသမီးက ဆိုပါတယ်။
ဒါ့အပြင် မိုးကုတ်မှတ်ပုံတင် ကိုင်ဆောင်ထားသူတွေကိုလည်း ဇီးပင်ကြီးမှာ ပေးမဖြတ်ဘဲ ပြန်လှည့်ခဲ့ရကြောင်း နောက်ထပ် မိုးကုတ်ဒေသခံ အမျိုးသမီးတစ်ဦးက ပြောပါတယ်။
”၁၆ မိုင်ဂိတ်ဆိုလား အဲမှာတော့ ၁ သောင်း ပေးလိုက်တော့ လွှတ်ပေးတယ်။အဲဒီ ဇီးပင်ကြီးဂိတ်လား မိုးကုတ်မှတ်ပုံတင်မို့ မန္တလေးနေထိုင်ကြောင်း ထောက်ခံစာမပါလို့တဲ့ လုံးဝ အဝင်မခံဘူး။ ပြန်လာခဲ့လိုက်ရတယ်” လို့ ပြောပါတယ်။
အခုလို ဖြစ်စဉ်ဟာ ပြင်ဦးလွင်ရှိ စစ်တက္ကသိုလ်ကျောင်းဆင်းပွဲကို စစ်ခေါင်းဆောင် မင်းအောင်လှိုင် ရောက်လာကတည်းက ဖြစ်ပွားနေတာဖြစ်ပြီး လက်ရှိအချိန်အထိ မြို့အဝင်အထွက် တင်းကြပ်စစ်ဆေးမှုတွေ ရှိနေပေမဲ့ မေမြို့ပန်းပွဲတော်ကို အလည်အပတ်လာသူတွေလည်း များနေကြောင်း မြို့ခံတွေရဲ့ ပြောပြချက်အရ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
