မာည်းရူပ၊ ကျံရ်ဒီဆဲမ်ဘာ ဆငည်း 5၊ မာဝ်းႎံင်း
တိုအီးခေဲင်အရာပ်ကဲ က္လာင်းတဆျှိုည်ဖီမျေဒါႈ တံပ်ကညာအာဏာဆီုက်ဇေဝ်ကဲ ဂီုည်ဘိဟာဝ်းဂါင် ဒါႈမိုႈအီးကတူည်ႇကႎှတောပ် တံပ်လံပ်တီုက်ႎှီုန်းကဲ ပကီုင်းမာဝ်းႎံင်း ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ႎီရ်ထိင်ခြဲအူန်း တံပ်ကညာအာဏာဆီုက်ဇေဝ်ကဲအောႏ။
ကဲဒါႈ ခည်ကျံရ်နိုႎဲမ်ဘာ နှားဖိုန်ဒိူန် တံပ်ကညာအာဏာဆီုက်ဇေဝ်ကဲ တိုည်းအူန်း ကိုအေးမော်င် အ်ုန်အီဂေါည် ပဇံင် 9ကာည်း ကိုလှာႇစော် အ်ုန်အီဂေါည်ရီမ်းပြောကျောင်သီဟိုဟ်ဂါရ်နီန် 2အီးအောႏ။
ကဝ်အီဂေါည်ပကီုင်းမာဝ်းႎံင်းနီန်အူအီး က္လာင်းတဆျှိုည်ဖီမျေဒါႈ ဆဲႈဒါႇဒီန် တံပ်ကညာအာဏာဆီုက်ဇေဝ်ကဲ ဆီုပ်ဘိဟာဝ်းဖါ်ႈ ဂါင်ဂေါည်အီးမံင်ခ္လ ဂါင်ကဲအီကတူႈဘိကဲဒီန် ကဲအာဝ်ပ္လိူရ်ႈစိ ဒါႈမိုႈအ်ုန်ကတူည်ႇကႎှတောပ် တံပ်ဆီုက်တအာင်း – TNLA ကဲကိက်အူန်းလိူည် ဒါႈမိုႈကဲကတူည်ႇကႎှတောပ်တံပ် PDF ကဲအောႏ။
အ်ုန်ဒါႈ “ကိုလှာႇစော်ဒီန် ကတူႈတိုည်းရအာည်ႇ။ ဆာ်မိုႈကိုအေးမော်င် အ်ုန်မိုႈအီတိူရ်ႈမေန်း မာဂံတ်အ်ုန်။ ယိူဝ်းကဲဒါႈ အ်ုန်အာဝ်ကတူည်ႇကႎှစိ တောပ် PDF ကဲ။ ဆာ်မိုႈတောပ် TNLA ဘည်မှောအ်ုန်ဘာည်း ကတူည်ႇကႎှမာ် အာဝ်နံပ်စိ”
အ်ုန်ဆီုပ်ဒါႈဘိုး ဆဲႈဒါႇဒီန် တံပ်ကညာအာဏာဆီုက်ဇေဝ်ကဲ တောႇစေတ်ဖါ်ႈ တာဘြောင်ဇံင် ကဲအီထာမ်းဇီုင်းကာန် ခည်ထိင်ခြဲ TNLA ကဲတကီုင်းမာဝ်းႎံင်းနီန် ဆာ်မိုႈမံင်အီး ကဲမဲႈဖါ်ႈလာ်ဒါ စေတ်အောႏ။
တံပ်ကညာအာဏာဆီုက်ဇေဝ်ကဲနီန် ဇူႈပွံတ်ကျံရ်အံက်တိုဘာ နှားဖိုန်ဒိူန် ကဲဇူႈဒေဘိဟာဝ်းဂါင်ခေဲင်ကီုင်း ဒါႈမိုႈအီးကတူည်ႇကႎှတောပ် တံပ်လံပ်တီုက်ႎှီုန်းကဲအောႏ။
တောပ်ဘည်စြာင်းပ်ုန်ဘိူန်းအူန်း ဖုင်ယဲဆျှိုည်ဖီမျေ ဂါင်ကဲအီကတူႈဘိကဲဒိူန် ဂေါည်ဖါ်ႈ ပေန်ကိူရ်ဂါင် အီကတူႈတိုည်းမာ် ဟည်ဂေါည်ဒေဲႈ 10အီးအာဝ်ယောမ်ယာ့်အောႏ။
တိုအီးခေဲင်အရာပ်ကဲ က္လာင်းတဆျှိုည်ဖီမျေဒါႈ တံပ်ကညာအာဏာဆီုက်ဇေဝ်ကဲ ဘိဟာဝ်းဖါ်ႈဂါင်ဂေါည်အီး ပကီုင်းဆဘောကာည်း ကီုင်းနော်င်ခေဝ် အ်ုန်အီမိုႈဒီပ်ုန်ႎီရ်ထိင်ခြဲအူန်းကဲ တိုအီးခေဲင်ကီုင်းမံင်ခ္လမာ် ကဲတိုည်းအူန်းအောႏ။
တံပ်ကညာအာဏာဆီုက်ဇေဝ်ကဲ ဟည်ႎီရ်ဘိူန်းဘိုး ဆီမ်းႎီရ် နော်င်ခေဝ်၊ မာဝ်းႎံင်းကာည်း ဆဘော ကဲအီမိုႈဒီပ်ုန်ထိင်ခြဲအူန်း တံပ်ဆီုက်တအာင်းကဲနီန် ခေဲင်ကျံရ်ဇူန်လည်ကာည်း ကျံရ်အံက်တိုဘာဒိူန်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
