ရွှေဖီမြေ၊ နိုဝင်ဘာ ၄ ရက်၊ နမ္မတူ
ဒီနေ့ နိုဝင်ဘာ ၄ ရက် မနက်အစောပိုင်းမှာ ရေကြီးရေလျှံမှုနဲ့ မြေပြိုမှုတွေကြောင့် တအာင်းတပ် ထိန်းချုပ်ထားတဲ့ နမ္မတူ-မန်တုံလမ်းနဲ့ နမ္မတူ-မိုင်းဘော်လမ်း သွားလာလို့ မရသေးကြောင်း ရွှေဖီမြေက စုံစမ်းသိရှိရပါတယ်။
နမ္မတူ-မန်တုံလမ်းမှာတော့ မြေပြိုမှု လမ်းတစ်လျှောက်မှာ ဖြစ်နေပေါ်နေပြီး နမ္မတူ-မိုင်းဘော် လမ်းမှာတော့ ရေကြီးရေလျှံမှု ဖြစ်ပွားနေတာ ဖြစ်ပါတယ်။
“နမ္မတူ-မန်တုံလမ်းကတော့ ၃ မိုင်ကနေ ၁၁ မိုင်အထိ မြေတွေ ရှယ်ပြိုထားတာ။ တအာင်းတပ်ကတော့ ဘက်ဖိုးတွေနဲ့ ရှင်းပေမဲ့ တစ်လျှောက်လုံးမှာ ဖြစ်နေတော့ အခုလောလောဆယ် သွားလာလို့ မရသေးဘူး။ နမ္မတူ-မိုင်းဘော်ကျတော့ ရေကြီးနေတာ။ မိုင်းစိန်ချောင်းမှာ ကြီးနေတာ။ လယ်တွေရော ရိတ်ထားတဲ့ စပါးတွေရော မြှုပ်ကုန်တာ” လို့ ဖြစ်စဉ်သိရှိသူ တစ်ဦးက ပြောပါတယ်။
မိုင်းစိန်ချောင်း ရေကြီးမှုမှာ တံတားအထိ ရေ ရောက်ရှိလာတာကြောင့် လယ်ကွက်အများစု ရေနစ်မြှုပ်နေပြီး ရိတ်သိမ်းထားတဲ့ စပါးတွေလည်း ရေထဲ မျှေပါသွားတာ ရှိတယ်လို့ ဆိုပါတယ်။
ရေကြီးမှုကြောင့် ဆုံးရှုံးမှုပမာဏကိုတော့ သီးခြားအတည်မပြုနိုင်သေးဘဲ လက်ရှိမှာတော့ လမ်းမပေါ်မှာ သွားလာလို့ မရသေးပေ။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
