ပိုႈလဘား၊ ကျံရ်အံက်တိုဘာ ဆငည်း 17၊ အိုမ်ငျံရ်
တိုအီးခေဲင်အရာပ်ကဲ အူအီး က္လာင်းဒါႈ ဂေါႇမိုႈတံပ်ကညာအာဏာဆီုက်ဇေဝ်ကဲ ဒါယာန်ပ်ုရ် ပျောႈဟာဝ်းပ္လေဘျုင် ပကီုင်းအိုမ်ငျံရ် အ်ုန်အီမိုႈ ဒီပ်ုန်ထိင်ခြဲအူန်း တံပ်ဆီုက်တအာင်းကဲ စီပဲန်ကောန်အီပ်ုန် 3အီး ဟည်ဘိူန်းဟာဝ်းဒီဆဲဝ်အောႏ။
အဒိူဝ်ကျံရ်အံက်တိုဘာ ဆငည်း 17 ခိင်ညှာ ကပံတ် 8နြီလေႈဒိူန် တံပ်ကညာအာဏာဆီုက်ဇေဝ်ကဲ ပျောႈဟာဝ်းပ္လေဘျုင် ရီမ်းကျောင် အ.ထ.က (1) အ်ုန်အီဂေါည်ပကီုင်းအိုမ်ငျံရ်အောႏ။
“အ်ုန်လဟာဝ်း ကောန်အီပ်ုန် 3အီး။ ကဲဒေဲႈပျောႈဟာဝ်း 3ပိုင်း။ ပအထက (1) အူပိုင်း။ ဒီဂေါည်ကောန်အီပ်ုန်ကဲ 1ပိုင်း။ ဇောႈခေဲင်ကီုင်းအူပိုင်း”
ဘာည်းလိူည်ဒီန် အဒိူဝ်ကျံရ်အံက်တိုဘာ ဆငည်း 17 ခိင်ညှာကပံတ် 7နြီဒိူန်မာ် ဂေါႇမိုႈကဲပျောႈဟာဝ်းပ္လေဘျုင် ခေဲင်ရဝ်ဟိုမိူင်း လှံင်အိုမ်ယ်ုရ် စီပဲန်ဘိူန်းအယ်နံပ် မိုႈတအ်ုန်တိူဝ်လတိုအီးအောႏ။
အမှိူဝ်ကျံရ်အံက်တိုဘာ ဆငည်း 16ဒိူန်မာ် ဂေါႇမိုႈတံပ်ကညာအာဏာဆီုက်ဇေဝ် ပျောႈဟာဝ်းပ္လေဘျုင် ခေဲင်ကီုင်းမိူင်းမီတ် စီပဲန်ကောန်အီပ်ုန်အူအီး ဘိူန်းဟာဝ်းဒီဆဲဝ်အောႏ။
ဇူႈပွံတ်ကျံရ်အံက်တိုဘာ ဆငည်း 1ဒိူန် တံပ်ကညာအာဏာဆီုက်ဇေဝ်ကဲ ပျောႈကစံပ်ဟာဝ်းပွံတ်ပ္လေဘျုင် ခေဲင်လှံင်ဆဘော၊ အိုမ်ငျံရ်၊ အိုမ်ယ်ုရ်၊ မိူင်းမီတ်၊ မိုဂူႈကာည်း ရူကောကဲနီန် တောန်ဆငည်းအောႏ။
ဂေါႇဘျုင်ပ်ုန်ပျောႈ တံပ်ကညာအာဏာဆီုက်ဇေဝ်ကဲ ခေဲင်ဘြည်အာရ်နှားလေႈနီန် တောပ်ဘည်စြာင်းပ်ုန်ကစုအူန်း ဖုင်ယဲဆျှိုည်ဖီမျေ တောပ်ပည်ကောန်ကညောမ် တိုအီးဟည်ယံမ်းဟာဝ်းဖါ်ႈ 33အီး တောပ်ပည်ကောန်ကညောမ် 10အီး တိုအီးဘာတ်ဟာဝ်း 40အီးအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
