ရွှေဖီမြေ၊ သြဂုတ် ၂ ရက်၊ သံတွဲ
အာရက္ခတပ်တော်- AA ထိန်းချုပ်ထားတဲ့ ရခိုင်ပြည်နယ် သံတွဲမြို့နယ် ရွှေလှရွာကို စစ်ကောင်စီတပ်က ဂျက်လေယာဉ်နဲ့ ဗုံး ထပ်မံ ကြဲချတိုက်ခိုက်ခဲ့ရာ ၄ ဦး သေဆုံးပြီး ၂ ဦး ဒဏ်ရာပြင်းထန်ခဲ့တယ်လို့ AA က သတင်းထုတ်ပြန်လာပါတယ်။
ပြီးခဲ့တဲ့ ဇူလိုင် ၃၁ ရက် နေ့လယ် ၃ နာရီဝန်းကျင်မှာ ရွှေလှရွာထဲ ဂျက်လေယာဉ်နဲ့ ဗုံး ၃ လုံး ကြဲချတိုက်ခိုက်ခဲ့ရာ ကလေး ၂ ဦးအပါအဝင် အမျိုးသားတစ်ဦးနဲ့ အမျိုးသမီးတစ်ဦး သေဆုံးခဲ့ပြီး နောက်ထပ် အမျိုးသား ၂ ဦး ထိခိုက်ဒဏ်ရာ ရခဲ့ပါတယ်။
ဒါ့အပြင် စစ်တပ်ရဲ့ ဗုံးကြဲတိုက်ခိုက်မှုကြောင့် နေအိမ်၊ ဆိုင်ခန်း၊ ကားနဲ့ ဆိုင်ကယ်တွေလည်း ပျက်စီးခဲ့တယ်လို့ ထုတ်ပြန်ချက်ထဲ ဖော်ပြထားပါတယ်။
စစ်တပ်ဟာ ၎င်းတို့လက်လွှတ်ထားရတဲ့ ရခိုင်ပြည်နယ်က နေရာတွေကို လေယာဉ်နဲ့ ဗုံးကြဲတိုက်ခိုက်တာတွေ မကြာခဏ ပြုလုပ်နေပြီး အရပ်သား သေဆုံးမှုတွေလည်း ဆက်တိုက် ရှိနေပါတယ်။
ပြီးခဲ့တဲ့ ဇူလိုင် ၂၄ ရက်မှာလည်း သံတွဲမြို့ပေါ် ရပ်ကွက်နဲ့ ရေကောက်ရွာမှာ စစ်တပ်က လေယာဉ်နဲ့ ဗုံးကြဲတိုက်ခိုက်ခဲ့ရာ အရပ်သား ၃ ဦး သေဆုံးပြီး ၂၁ ဦး ထိခိုက်ဒဏ်ရာ ရခဲ့ပါတယ်။
အရပ်သားတွေအပေါ် စစ်တပ်ရဲ့ ဗုံးကြဲတိုက်ခိုက်နေတာကိုကြည့်ရင် ၎င်းတို့ရဲ့ ငြိမ်းချမ်းရေး ဖိတ်ခေါ်နေမှုဟာ အပြောနဲ့အလုပ် လက်တွေ့မကျဘူးဆိုတာ သက်သေပြနေတယ်လို့ AA က ပြောဆိုထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
