ရွှေဖီမြေ၊ ဧပြီ ၈ ရက်၊ ကွတ်ခိုင်
ရှမ်းမြောက် ကွတ်ခိုင်မြို့ကနေ မန္တလေးကိုပို့မယ့် ကျပ် ၁၅ ဘီလီယံကျော် တန်ဖိုးရှိတဲ့ မူးယစ်ဆေးဝါးတွေကို ဖမ်းဆီးရမိကြောင်း စစ်ကောင်စီက မနေ့ ဧပြီ ၇ ရက်မှာ သတင်းထုတ်ပြန်ပါတယ်။
ပြီးခဲ့တဲ့ ဧပြီ ၆ ရက်မှာ မန္တလေးတိုင်း အမရပူရမြို့နယ် ဒေါင်းရွေးကျေးရွာရှိ အောင်ကျော်စိုးနဲ့ ၎င်းရဲ့ဇနီးဖြစ်သူ သူဇာဆန်းရဲ့နေအိမ်မှာ စိတ်ကြွရူးသွပ်ဆေးပြား ၉၉.၂၂ သိန်းနဲ့ ဘိန်းဖြူ ၅.၅ ကီလိုဂရမ် ဖမ်းဆီးရမိခဲ့တယ်လို့ ဆိုပါတယ်။
ဖမ်းဆီးရမိထားတဲ့ မူးယစ်ဆေးဝါးတွေရဲ့ ကာလတန်ဖိုး စုစုပေါင်း ၁၅.၀၂ ဘီလီယံ တန်ဖိုးရှိတယ်လို့ စစ်ကောင်စီရဲ့ ထုတ်ပြန်ချက်ထဲ ဖော်ပြထားပါတယ်။
ဖမ်းဆီးရမိတဲ့ တရားခံတွေရဲ့ ထွက်ဆိုချက်အရ ကွတ်ခိုင်မြို့နေ အိုက်ချွန်ဆိုသူက မူးယစ်ဆေးဝါးတွေကို မန္တလေးဘက် ပို့ဆောင်ပြီး အောင်ကျော်စိုးနဲ့ ၎င်းရဲ့ ဇနီးဖြစ်သူက မန္တလေးမှာ တာဝန်ယူ ဖြန့်ဖြူးရောင်းချနေတယ်လို့ ဆိုပါတယ်။
ပြီးခဲ့တဲ့ ဧပြီ ၅ ရက်မှာလည်း ရှမ်းမြောက် ကျေးသီးမြို့နယ် ဝမ်ဟိုင်းဒေသကနေ အာရက္ခတပ်တော်- AA ထံ ပို့ဆောင်မယ့် ၁၁.၇ ဘီလီယံ တန်ဖိုးရှိတဲ့ မူးယစ်ဆေးဝါးတွေကို ဖမ်းဆီးရမိခဲ့တယ်လို့ စစ်ကောင်စီက ဝါဒဖြန့်ထုတ်ပြန်ခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
