သုတ၊ မတ်လ ၂၆ ရက်၊ လားရှိုး
ရှမ်းမြောက် လားရှိုးမြို့မှာ စစ်ကောင်စီရဲ့ ဌာနဆိုင်ရာဝန်ထမ်းတွေကိုသာ စက်သုံးဆီ လိုသလောက် ထည့်ပေးနေပြီး လူထုတွေတော့ ဆီရဖို့ကို ညအိပ်ပြီး စောင့်ဆိုင်းနေရတယ်လို့ လားရှိုးမြို့ခံတွေက ရွှေဖီမြေကို ပြောပါတယ်။
စက်သုံးဆီရဖို့ စစ်ကောင်စီရဲ့ ဌာနဆိုင်ရာဝန်ထမ်းတွေက တန်းစီစရာ မလိုဘဲ လိုသလောက် ရနေပြီး လူထုတွေက နာရီနဲ့ချီ တန်းစီကာ စောင့်ဆိုင်းနေရပေမဲ့ ဆီကိုတော့ အကန့်အသတ်နဲ့သာ ရောင်းချပေးနေတယ်လို့ ဆိုပါတယ်။
“ဌာနဆိုင်ရာဆိုရင် အနောက်ပေါက်ကနေ ဖွင့်ပေးတယ်။ ကြိုက်သလောက် ထည့်။ သူတို့လူဆို အေးဆေးပဲ။ ပြည်သူတွေကတော့ နေပူထဲမှာ ရပ်နေရတယ်။ ပြည်သူကားဆိုရင် ဆိုင်ကယ် ၁ သောင်း၊ ကား ၅ သောင်းလောက်ပဲ” လို့ ဒီနေ့ မတ်လ ၂၆ ရက်မှာ ဆီရဖို့ တန်းစီစောင့်ဆိုင်းနေသူတစ်ဦးက ရွှေဖီမြေကို ပြောပါတယ်။
ဒီနေ့ မတ်လ ၂၆ ရက်မှာ လားရှိုးမြို့အတွင်း ဆီတစ်လီတာကို ၉ ထောင်အထိ ဈေးရှိနေပြီး မြို့ပြင် ပန့်ဆီဆိုင်တွေမှာတော့ ဆီ တစ်လီတာကို ၁၃,၀၀၀ ကျပ်အထိ ဈေးမြှင့်တက်လာတယ်လို့ ဒေသခံတွေက ပြောဆိုပါတယ်။
“ဌာနဆိုင်ရာလို့ ပြောလိုက်ရင် ဆီက ရပြီတဲ့။ တချို့လည်း ယူနီဖောင်း ဝတ်ပြီး တန်းစီတဲ့သူလည်း ရှိတယ်။ ပြည်သူတွေဆိုရင် ဆီရဖို့ တစ်ရက်လောက် တန်းစီရတယ်” လို့ နောက်ထပ် လားရှိုးမြို့ခံ အမျိုးသမီးတစ်ဦးက ရွှေဖီမြေကို ပြောပါတယ်။
စစ်ကောင်စီဘက်က ဆီ ရက် ၅၀ စာ ရှိထားပြီး စက်သုံးဆီ ပြတ်လပ်မှု မရှိအောင် ဆောင်ရွက်နေတယ်လို့ ပြောဆိုထားပေမဲ့ နိုင်ငံတဝန်းမှာ စက်သုံးဆီ ပြတ်လပ်တာ၊ အကန့်အသတ်နဲ့ ဝယ်ယူရတာတွေ ကြုံနေကြရပါတယ်။
ဒါ့အပြင် ဆီချွေတာဖို့ဆိုပြီး ဝန်ထမ်းအနေနဲ့ ဗုဒ္ဓဟူးနေ့တိုင်းမှာ နေအိမ်မှာသာ အလုပ်လုပ်ကြဖို့ စစ်ကောင်စီက ပြီးခဲ့တဲ့ မတ်လ ၂၂ ရက်မှာ ထုတ်ပြန်ထားပါတယ်။
အီရန်၊ အစ္စရေးနဲ့ အမေရိကန်တို့ရဲ့ စစ်ပွဲကြောင့် ကမ္ဘာ့စက်သုံးဆီ သယ်ယူခွင့် ကန့်သတ်ခံရပြီးနောက် မြန်မာအပါအဝင် နိုင်ငံအများစုက စက်သုံးဆီ အလုံအလောက် မရရှိတဲ့ ပြဿနာနဲ့ ရင်ဆိုင်နေရတာလည်း ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
