မိုင်းသူရ၊ မတ်လ ၂၆ ရက်၊ လားရှိုး
စစ်ကောင်စီ ပြန်လည် ထိန်းချုပ်ထားတဲ့ ရှမ်းမြောက် လားရှိုးမြို့ ရပ်ကွက်(၁)၊ နယ်မြေ(၈)မှ နယ်မြေမှူးက စစ်မှုထမ်း အကြောင်းပြပြီး လူထုတွေထံ ငွေကြေး ကောက်ခံနေတယ်လို့ ကိုယ်တိုင်ပေးခဲ့တဲ့သူတွေနဲ့ နီးစပ်သူတွေက ရွှေဖီမြေကို ပြောပါတယ်။
ရပ်ကွက်(၁)၊ နယ်မြေ(၈)က နယ်မြေမှူး ဦးပြူးဆိုသူဟာ စစ်မှုထမ်းကြေးဆိုပြီး အကြောင်းပြကာ လူထုတွေထံ မိသားစုလိုက်ပေါ် မူတည်ပြီး ငွေကို လစဉ် တောင်းခံနေတယ်လို့ ဆိုပါတယ်။
“မိန်းမသားနေတဲ့ အိမ်တွေတောင် လာတောင်းနေတာ။ တချို့အိမ်ဆို တစ်လ ၅ ထောင်၊ တချို့ဆို တစ်လ တစ်သောင်း လာတောင်းနေတာ။ မဆီမဆိုင် ပိုက်ဆံ လိုက်တောင်းနေတာ။ ရပ်ကွက်(၁)၊ နယ်မြေ(၈)ဆိုတာ အဆင်မပြေတဲ့အိမ် များတယ်” လို့ ကိုယ်တိုင်ပေးခဲ့ရသူနဲ့ နီးစပ်တဲ့ လားရှိုးမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
လားရှိုးမြို့မှာ ပြီးခဲ့တဲ့ ၂၀၂၆ ခုနှစ် နှစ်ဆန်းပိုင်းကစပြီး စစ်မှုထမ်းဖို့အတွက် စာရင်းတွေ စတင်ကောက်ခံနေတယ်လို့ သတင်း ထွက်ပေါ်ပြီးနောက် စစ်ကောင်စီရဲ့ လက်အောက်ခံ နယ်မြေမှူးတွေက လူထုတွေထံ စစ်မှုထမ်းကြေးဆိုပြီး ငွေ ကောက်ခံတာတွေ ပြုလုပ်လာတာ ဖြစ်ပါတယ်။
လားရှိုးမြို့အပြင် ရှမ်းမြောက် နောင်ချို၊ ကျောက်မဲနဲ့ တန့်ယန်းမြို့နယ်မှာလည်း စစ်ကောင်စီဘက်က စစ်မှုထမ်းဖို့စာရင်း စတင်ကောက်ခံနေတယ်လို့ ဒေသခံတွေက ရွှေဖီမြေကို ပြောပါတယ်။
“ကျောက်မဲမှာဆိုရင် တစ်ရပ်ကွက် ၂ ယောက် သွားရမှာတဲ့။ လူငှားမယ်လို့ ကြားတယ်။ ပြီးတော့ လူငှားဖို့ ပိုက်ဆံ ကောက်မှာတဲ့” ဆိုပြီး ကျောက်မဲမြို့ခံ အမျိုးသားတစ်ဦးက ပြောပါတယ်။
ပြီးခဲ့တဲ့ ၂၀၂၄ ခုနှစ် ဖေဖော်ဝါရီ ၁၀ ရက်မှာ စစ်တပ်က စစ်မှုမထမ်းမနေရဥပဒေကို စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က အတည်ပြု ပြဋ္ဌာန်းခဲ့တာပဲ ဖြစ်ပါတယ်။
လက်ရှိမှာ စစ်မှုထမ်းသင်တန်း အပတ်စဉ်(၂၃)အထိ စစ်တပ်ဘက်က ဖွင့်လှစ်ထားပြီး အပတ်စဉ်တစ်ခုကို စစ်မှုထမ်းတပ်သားဦးရေ ၅ ထောင်အထိ သတ်မှတ်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
