သုတ၊ မေလ ၂၇ ရက်၊ လားရှိုး
စစ်ကောင်စီတပ် ထိန်းချုပ်ထားတဲ့ ရှမ်းမြောက် လားရှိုးမြို့မှာ စစ်ကောင်စီ လက်အောက်ခံ ယာဉ်ထိန်းရဲက လိုင်စင်မဲ့ယာဉ်နဲ့ ယာဉ်စည်းကမ်း မလိုက်နာတဲ့သူတွေကို ဖမ်းဆီးနေပြီး ငွေတောင်းကြမ်းနေတယ်လို့ လားရှိုးမြို့ခံတွေက ရွှေဖီမြေကို ပြောပါတယ်။
ယာဉ်မောင်းလိုင်စင်အပါအဝင် နံပါတ်ပြား၊ ဆိုင်ကယ်ဘတ်မှန်၊ ဆိုင်ကယ်ဦးထုပ် မပါတဲ့သူတွေကို ယာဉ်ထိန်းရဲက ပစ်မှတ်ထားပြီး ဖမ်းဆီးနေတာပဲ ဖြစ်ပါတယ်။
ဖမ်းဆီးခံရသူတွေကို ငွေ ၃ သောင်းကျပ်ကနေ ၁ သိန်းအထိ တောင်းနေတယ်လို့ လားရှိုးမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
“အခုက ရှယ်စစ်နေတာ။ လားရှိုးကြီး၊ မြို့ရှောင်လမ်းဘက်ကိုလည်း စစ်တယ်။ ပုံမှန်စစ်တာကတော့ စည်ပင်ရုံးရှေ့နဲ့ ယာဉ်ထိန်းရုံးရှေ့မှာ စစ်တာ။ ကားဆို ယာဉ်မောင်းလိုင်စင် မပါရင် ၅ သောင်း၊ ၁ သိန်းအထိ တောင်းတာ။ ဆိုင်ကယ်ဆို ပုံမှန် ၃ သောင်းတောင်းတာ”
ဒါ့အပြင် ယာဉ်ထိန်းရဲဟာ လားရှိုးမြို့ခံတွေထက် တခြားဒေသကနေ လာတဲ့သူတွေကို ပစ်မှတ်ထားပြီး ငွေတောင်းကြမ်းနေတာ တွေ့ရတယ်လို့ ၎င်းက ဆက်ပြောပြပါတယ်။
နောက်ထပ် လားရှိုးမြို့ခံ အမျိုးသားတစ်ဦးကလည်း “လားရှိုးမှာက ယာဉ်ထိန်းရဲတွေက ရှယ်စစ်နေတာ။ ပိုက်ဆံလည်း ရှယ်တောင်းကြမ်းနေတာ” လို့ ပြောပါတယ်။
ယာဉ်ထိန်းရဲက ယာဉ်စည်းကမ်း မလိုက်နာတဲ့သူတွေကို ဖမ်းဆီးတာ ဖြစ်သင့်ပေမဲ့ အခုလို လိုင်စင်မဲ့ အကြောင်းပြပြီး ငွေတောင်းကြမ်းနေတဲ့အပေါ် မြို့ခံတွေက ဝေဖန်နေကြပါတယ်။
လားရှိုးမြို့ကို စစ်ကောင်စီက ပြီးခဲ့တဲ့ ၂၀၂၅ ခုနှစ် ဧပြီလထဲ တရုတ်နိုင်ငံရဲ့ ကြားဝင်မှုနဲ့ ကိုးကန့်တပ်- MNDAA ဆီကနေ ပြန်လည်ရယူခဲ့တာပဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
