အလင်း၊ မေလ ၂၂ ရက်၊ ကန်ပက်လက်
ချင်းပြည်နယ်တောင်ပိုင်း ကန်ပက်လက်မြို့နယ်ဘက် စစ်ကြောင်း ထိုးလာတဲ့ စစ်ကောင်စီတပ်ဟာ လက်ရှိမှာ မြို့အဝင်ထိ ရောက်ရှိလာပြီး တိုက်ပွဲ ပြင်းထန်နေတယ်လို့ ရှေ့တန်း စစ်ရေးသတင်းရင်းမြစ်က ရွှေဖီမြေသို့ ပြောပါတယ်။
မကွေးတိုင်း ဆောမြို့ကနေ စစ်ကြောင်း ထိုးလာတဲ့ စစ်တပ်ဟာ ကန်ပက်လက်မြို့ ဒေသအခေါ် ၆ မိုင်အထက် မြို့အဝင် ဘုန်းကြီးကျောင်းအောက်ရှိ ထင်းရှူးတောထဲ မနေ့ မေလ ၂၁ ရက်မှာ ရောက်ရှိလာတာပဲ ဖြစ်ပါတယ်။
“၆ မိုင်နဲ့ ကန်ပက်လက်က သိပ်မဝေးတော့ဘူး။ အခု စစ်ကြောင်းက ၆ မိုင်အထက် မြို့အဝင်ထိကို ရောက်ပြီ။ တိုက်ပွဲတွေက ပြင်းထန်နေပါတယ်။ တိုက်ပွဲအခြေအနေ အသေးအစိတ် မသိရသေးဘူး” လို့ ရှေ့တန်း စစ်ရေးသတင်းရင်းမြစ်က ရွှေဖီမြေသို့ ပြောပါတယ်။
ဒါ့အပြင် ကန်ပက်လက်မြို့နဲ့ ၆ မိုင်ကြားမှာရှိတဲ့ အရပ်သားနေအိမ်တွေကို စစ်တပ် စစ်ကြောင်းက မီးရှို့ဖျက်ဆီးနေတယ်လို့ သိရပါတယ်။
စစ်တပ်ဟာ ကန်ပက်လက်မြို့ကို မြေပြင်ကနေ စစ်ကြောင်း ထိုးနေသလို လေကြောင်းကနေလည်း ဆက်တိုက် ဗုံးကြဲတိုက်ခိုက်နေပါတယ်။
မနေ့ မေလ ၂၁ ရက်နဲ့ ၂၂ ရက်မှာ စစ်တပ်က ကန်ပက်လက်မြို့ကို လေကြောင်းကနေ ဗုံးကြဲတိုက်ခိုက်ခဲ့ပါတယ်။
ဒီနေ့ မေလ ၂၂ ရက် မနက် ၂ နာရီဝန်းကျင်မှာ တံတားဦး လေတပ်စခန်းကနေ တက်လာတဲ့ ဂျက်ဖိုက်တာ ၂ စီးဟာ ကန်ပက်လက်မြို့ထဲက နေရာတစ်နေရာကို လေကြောင်း တိုက်ခိုက်မှု ၄ ကြိမ် ပြုလုပ်ခဲ့သလို ဒီမနက်မှာလည်း ၄ ကြိမ် ထပ်မံ ဗုံးကြဲခဲ့ပါတယ်။
“ဒီနေ့မနက်မှာ လေကြောင်း တိုက်ခိုက်မှု ၈ ကြိမ်လောက် ပြုလုပ်သွားပါတယ်။ မြို့ထဲမှာပဲ ကြဲသွားတာပါ။ မနေ့ကလည်း ကြဲတယ်။ အခုထိလည်း ကင်းထောက်လေယာဉ် မြို့ပေါ်မှာ ဝဲနေဆဲပါ” လို့ ရှေ့တန်း စစ်ရေးသတင်းရင်းမြစ်က ရွှေဖီမြေသို့ ပြောပါတယ်။
လက်ရှိမှာ တိုက်ပွဲ ပြင်းထန်နေတာကြောင့် ကန်ပက်လက်မြို့နယ်အတွင်းရှိ လူထုတွေ လူစုလူဝေး မပြုလုပ်ဖို့ တော်လှန်ရေးရဲဘော်တွေ မဟုတ်ရင် ပြောက်ကျားဝတ်စုံ ဝတ်ဆင်တာ မပြုလုပ်ကြဖို့ မြို့နယ် ပကဖက အသိပေးထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
