ရဲမာန်၊ မတ်လ ၂၆ ရက်၊ ကသာ
စစ်ကိုင်းတိုင်း ကသာမြို့ပေါ်မှာ ပိတ်မိနေတဲ့ အရပ်သားတွေကို စစ်ကောင်စီတပ်က ထွက်ခွာခွင့် မပေးဘူးလို့ ဒေသခံအမျိုးသားတစ်ဦးက ရွှေဖီမြေကို ပြောပါတယ်။
ကသာမြို့ရဲ့ ဗဟိုအချက်အချာဖြစ်တဲ့ ရပ်ကွက် ၁၊ ၂၊ ၃၊ ၄ တို့မှာ အရပ်သားတွေ အများဆုံး ပိတ်မိနေပြီး အရပ်သား နေထိုင်တဲ့နေရာတွေထဲ စစ်တပ်ကို ထောက်ခံသူနဲ့ အစိုးရဝန်ထမ်းဟောင်းတွေလည်း ပါတယ်လို့ ၎င်းက ပြောပါတယ်။
“ကသာမြို့ရဲ့ သဘောတရားက အနောက် တောင် မြောက်က ထွက်လို့မရဘူး။ အရှေ့ဘက်က ဧရာဝတီမြစ် ခံထားတယ်။ အဲမြစ်ကို စက်လှေနဲ့တဆင့် ကူးမှ ထွက်လို့ရတာ။ တောင်ဘက်ကနေ ထွက်မယ်ဆိုလည်း ၃၀၉ တပ်ရင်းရှိတယ်။ အဲလိုနေရာက တိုက်ပွဲဖြစ်နေတဲ့ ဧရိယာတွေ ဖြစ်နေတော့ ထွက်ရှောင်လို့မရဘူး။ တိုက်ပွဲမဖြစ်တဲ့ ဧရာဝတီတစ်ဖက်ကမ်းကို ကူးမယ်ဆိုလည်း မြစ်ရိုးတန်းတစ်လျှောက်ကို စစ်ကောင်စီတပ်က အားလုံးနေရာယူထားတယ်။ အရပ်သားတွေကတော့ အထဲမှာဘဲ ဖြစ်သလို နေ နေရပါတယ်။ တိုက်ပွဲ ဖြစ်ပွားနေတော့ ကျန်ရှိနေတဲ့ အရပ်သားဦးရေတော့ အတိအကျ မသိရဘူး”
စစ်တပ်က အရပ်သားတွေကို ထွက်ခွာခွင့် မပေးတဲ့အပြင် လေယာဉ်တွေနဲ့ပါ ဗုံး ပတ်ကြဲနေတယ်လို့ ၎င်းက ရွှေဖီမြေကို ပြောပါတယ်။
“မနေ့က မနက်ပိုင်းမှာ Y-12 ၃ စီး၊ ညနေပိုင်းမှာကျတော့ Y-12 ၅ စီးနဲ့ ဗုံးပတ်ကြဲတာတွေရှိတယ်။ ဒီနေ့လည်း ဗုံးပတ်ကြဲနေတုန်း”
ပြီးခဲ့တဲ့ မတ်လ ၂၄ ရက် ည ၁၁ နာရီဝန်းကျင်မှာ စစ်တပ်က ကသာမြို့နယ် ကျောက်ဒိုးကြီးတိုက်နယ် ပြည်သူ့ဆေးရုံကို ဂျက်ဖိုက်တာနဲ့ ဗုံးကြဲခဲ့ရာ လူထိခိုက်သေဆုံးမှု မရှိခဲ့ဘူးလို့ သိရပါတယ်။
မတ်လ ၂၀ ရက် မနက် ၁၀ နာရီဝန်းကျင်မှာ စစ်တပ်က ကသာမြို့နယ်ထဲက စစ်ရှောင်တွေ နေထိုင်တဲ့ ဘုန်းကြီးကျောင်းကို ဗုံးကြဲတိုက်ခိုက်ခဲ့တာကြောင့် သံယာတော်အပါအဝင် စစ်ရှောင် ၄၀ ဦးထက်မနည်း သေဆုံးခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
