ဝတ်ရည်၊ ဧပြီ ၄ ရက်၊ မြောင်
စစ်ကိုင်းတိုင်း မြောင်မြို့နယ်မှာ တိုက်ပွဲဖြစ်ပွါးခြင်းမရှိပဲ လေကြောင်းကနေ တိုက်ခိုက်ခဲ့ရပြီး ဒေသခံ ၄ ဦး ဒဏ်ရာရရှိခဲ့တယ်လို့ ဒေသခံအမျိုးသားတစ်ဦးက ရွှေဖီမြေကို ပြောပါတယ်။
မနေ့ ဧပြီလ ၃ ရက် ညနေ ၅ နာရီ ၅ မိနစ်မှာ မြောင်မြို့နယ် နဘက်ကျေးရွာကို စစ်ကောင်စီတပ်က ဂျက်ဖိုက်တာ ၂ စီးနဲ့ ဗုံး ၄ လုံးကြဲချတိုက်ခိုက်ခဲ့တာ ဖြစ်ပါတယ်။
ဒေသခံ အမျိုးသားတစ်ဦးက “ဒဏ်ရာရတဲ့ထဲက ၂ ဦးက စိုးရိမ်ရပါတယ်ဗျ။ အဲဘက်ဒေသဆို တိုက်ပွဲမဖြစ်ပဲ လေကြောင်းတိုက်ခိုက်ခဲ့တာပါ။ ဒေသခံလူထုတွေကို ပစ်မှတ်ထားပြီး တိုက်ခိုက်တာပါဗျ” ဆိုပြီး ပြောပါတယ်။
စစ်ကောင်စီတပ်ရဲ့ အဲဒီလေကြောင်းတိုက်ခိုက်မှုကြောင့် အမျိုးသား ၂ ဦးနဲ့ အမျိုးသမီး ၂ ဦးတို့ ဒဏ်ရာရရှိခဲ့တာဖြစ်ပြီး နေအိမ် ၁ လုံးလည်း ထိမှန်ပျက်စီးခဲ့တယ်လို့ ဆိုပါတယ်။
တော်လှန်ရေးတပ်တွေ ထိန်းချုပ်ထားတဲ့ မန္တလေးတိုင်းအပါအဝင် စစ်ကိုင်းတိုင်းနဲ့ မကွေးတိုင်းအတွင်းက နယ်မြေတွေကိုလည်း စစ်ကောင်စီတပ်က မြေပြင်ထိုးစစ်တွေ ဆက်တိုက်လုပ်ဆောင်နေသလို လေကြောင်းတိုက်ခိုက်မှုတွေကိုလည်း ဆက်တိုက်လုပ်ဆောင်တာကြောင့် ဒေသခံ ထိခိုက်သေဆုံးမှုတွေလည်း နေ့စဉ်ရက်ဆက် ရှိနေပါတယ်။
လေကြောင်းတိုက်ခိုက်မှုတွေထဲမှာ စစ်ကိုင်းတိုင်းက အများဆုံး တိုက်ခိုက်ခံရပြီး မကွေးတိုင်းက ဒုတိယအများဆုံး ဖြစ်ကြောင်း မြန်မာ့စစ်ဘက်ရေးရာနဲ့ လုံခြုံရေးဆိုင်ရာ လေ့လာရေးအဖွဲ့ (MDSI) ရဲ့ ပြီးခဲ့တဲ့ ဇန်နဝါရီ ၅ ရက် ထုတ်ပြန်ချက်အတွင်း ဖော်ပြထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
