မြတ်နိုး၊ ဇူလိုင် ၁၈၊ ကံပိုင်တည်
ကချင်ပြည်နယ် ကံပိုင်တည်–ဝိုင်းမော် လမ်းမကြီးမှာ မြေပြိုလို့ လမ်းပိတ်နေတဲ့အတွက် ရက်အတော်ကြာ ပိတ်မိနေတဲ့ ကုန်တင်ကားတွေကို ကချင်တပ်မတော်-KIA ဘက်က ဧည့်စာရင်းအကြောင်းပြပြီး ကားတစ်စီးကို တစ်ရက် ၁၂,၀၀၀ ကျပ်နှုန်းနဲ့ ကောက်ခံနေတယ်လို့ ယာဉ်မောင်းတွေက ပြောပါတယ်။
မိုးသည်းထန်စွာ ရွာသွန်းတာကြောင့် လမ်းပေါ်မှာ တောင်ပြို၊ မြေပြိုမှု ဖြစ်ပွားခဲ့ပြီး ကုန်တင်ကား အများအပြား ရှေ့မတိုး နောက်မဆုတ်နိုင်ဘဲ လမ်းဘေးမှာ ရက်ပေါင်းများစွာ ရပ်နားစောင့်ဆိုင်းနေရတာ ဖြစ်ပါတယ်။
“တောင်ပြိုလို့ လမ်းပိတ်တော့ ကားသမားတွေ စရိတ်တွေလည်း ပြတ်နေတယ်။ အဲဒီလို အခြေအနေမှာ KIA က ဧည့်စာရင်းဆိုပြီး တစ်ရက်ကို ၁၂,၀၀၀ ကျပ် ကောက်နေတယ်” လို့ ယာဉ်မောင်းတစ်ဦးက ပြောပါတယ်။
နောက်ထပ် ယာဉ်မောင်းတစ်ဦးကလည်း လမ်းပိတ်တာကြောင့် နေ့စဉ် စားသောက်စရိတ်တွေ ကုန်ကျနေရပြီး ဧည့်စာရင်းကြေး ထပ်ပေးရတာကြောင့် ဝန်ထုတ်ဝန်ပိုးတစ်ခု ဖြစ်နေတယ်လို့ ဆိုပါတယ်။
“ကားကလည်း မသွားရသေးဘူး။ နေ့တိုင်း စားရသောက်ရတာနဲ့တင် ကုန်ကျစရိတ်များနေပြီ။ အဲဒီအပေါ် ဧည့်စာရင်းကြေးပါ ထပ်ကောက်တော့ ကားသမားတွေအတွက် ပိုခက်ခဲတာပေါ့” လို့ သူက ပြောပါတယ်။
မိုးဆက်တိုက် ရွာနေလို့ ကံပိုင်တည် နဲ့ ဝိုင်းမော်ကြား ကားလမ်းမကြီးပေါ် တောင်တွေ ထပ်ပြိုနေတာကြောင့် ခရီးသွားကားတွေနဲ့ ကုန်ကားတွေ အများအပြား ပိတ်မိနေတာဖြစ်ပြီး လက်ရှိမှာတော့ လမ်းတွေ ရှင်းလင်း ပြုပြင်နေဆဲဖြစ်ကာ သွားလို့မရသေးပဲ ပိတ်မိနေကြဆဲ ဖြစ်တယ်လို့ သူက ပြောပါတယ်။
ကံပိုင်တည်–ဝိုင်းမော်လမ်းဟာ မြစ်ကြီးနားနဲ့ တရုတ်–မြန်မာနယ်စပ် ကံပိုင်တည်ကုန်သွယ်ရေးဂိတ်ကို ဆက်သွယ်ထားတဲ့ အရေးပါတဲ့ ကုန်သွယ်ရေးလမ်းကြောင်းတစ်ခု ဖြစ်ပါတယ်။
မိုးရာသီရောက်တိုင်း မြေပြို၊ တောင်ပြိုမှုတွေ မကြာခဏ ဖြစ်ပွားလေ့ရှိပြီး ဒီနှစ်မှာလည်း မိုးအဆက်မပြတ် ရွာသွန်းတာကြောင့် လမ်းပိုင်းတချို့ ပျက်စီးကာ ကုန်တင်ယာဉ် ရာနဲ့ချီ ပိတ်မိခဲ့ပါတယ်။
ဒေသခံတွေရဲ့ ပြောကြားချက်အရ လမ်းရှင်းလင်းရေးလုပ်ငန်းတွေ ဆက်လုပ်နေဆဲဖြစ်ပေမယ့် လမ်းကို ဘယ်အချိန်မှာ အပြည့်အဝ ပြန်ဖွင့်နိုင်မလဲဆိုတာ မသိရသေးဘူးလို့ ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
