ရွှေဖီမြေ၊ ဇူလိုင် ၁၈ ရက်
တရုတ်နိုင်ငံထဲ မိုးပြင်းထန်စွာရွာသွန်းမှုနဲ့ ရေကြီးရေလျှံမှုတွေကြောင့် မြန်မာနယ်စပ်အနီးမှာရှိတဲ့ တရုတ်နိုင်ငံထဲက ရေကာတာတစ်ခုကို ပြီးခဲ့တဲ့ ဇူလိုင် ၈ ရက်ကစပြီး တရုတ်က ဖွင့်ချဖို့ ထုတ်ပြန်ခဲ့ပြီးတဲ့နောက် ရွှေလီမြစ်ကမ်းဘေးမှာရှိတဲ့ နမ့်ခမ်းမြို့နယ်ထဲမှာ ရေတွေမြင့်တက်လာခဲ့ပါတယ်။
ရေကာတာဖွင့်ချခဲ့ချိန်ကစပြီး လက်ရှိအချိန်အထိ ရွှေလီမြစ်ကမ်းဘေးမှာရှိတဲ့ ဒေသခံတွေရဲ့ ကြံခင်း၊ ပြောင်းခင်း၊ စပါးခင်းနဲ့ အခြားစိုက်ပျိုးခင်းတွေ ရေလွှမ်းမိုးခြင်းဒဏ်ကို ခံစားကြရသလို သဲထုတ်လုပ်ငန်းတွေနဲ့ ကမ်းကူးလုပ်ငန်းတွေအကုန်လုံး ရပ်နားကြရတယ်လို့ တအာင်းသဘာဝပတ်ဝန်းကျင်စောင့်ကြည့်ရေးအဖွဲ့ – TEWG က ဆိုပါတယ်။
ဒါ့အပြင် ရွှေလီရေအားလျှပ်စစ်စီမံကိန်း အမှတ် (၁) ရေကာတာကိုလည်း ဖွင့်ချမယ့်အခြေအနေရှိမရှိ မသိရသေးတာကြောင့် တရုတ်နိုင်ငံအနေနဲ့ ဒေသခံပြည်သူလူထုရဲ့ ဘေးကင်းလုံခြုံရေးကို ရှေးရှုပြီး မြစ်ကမ်းဘေးမှာနေထိုင်ကြတဲ့ ပြည်သူတွေကို ကြိုတင်ပြင်ဆင်နိုင်ဖို့အတွက် ရေကာတာတွေကနေ ရေလွှတ်ချမယ့်အခြေအနေတွေနဲ့ ပက်သက်ပြီး မှန်ကန်တဲ့ သတင်းအချက်အလက်တွေကို အချိန်နဲ့တပြေးညီ ဖြန့်ဝေပေးဖို့ ၎င်းတို့ တောင်းဆိုထားပါတယ်။
နောက်ဆုံး ရေကြီးရေလျှံမှုကြောင့် ဖြစ်ပေါ်လာမယ့် ဘေးအန္တရာယ်တွေကို လျှော့ချနိုင်ဖို့အတွက် ပြည်သူတွေရဲ့ ဘေးကင်းလုံခြုံမှုကို မြှင့်တင်ပေးနိုင်ဖို့အတွက် တရုတ်အစိုးနဲ့ မြန်မာနယ်စပ်ရှိ သက်ဆိုင်ရာအဖွဲ့အစည်းတို့အကြား ပူးပေါင်းဆောင်ရွက်ဖို့ လိုအပ်တယ်လို့ တိုက်တွန်းခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
