မိုင်းသူရ၊ မတ်လ ၂၇ ရက်၊ မိုးမိတ်
တော်လှန်ရေးတပ်တွေ ထိန်းချုပ်ခဲ့တဲ့ ရှမ်းမြောက် မိုးမိတ်မြို့နယ်နဲ့ မန္တလေးတိုင်း သပိတ်ကျင်းမြို့နယ် တွင်းငယ်လမ်းပိုင်းကို စစ်ကောင်စီတပ် ပြန်ထိန်းချုပ်ပြီးနောက် မိုးမိတ်-မြစ်ဆုံလမ်းပိုင်းကို စစ်ရေး ဦးတည်လာတယ်လို့ မိုးမိတ်မြို့ခံ အမျိုးသားတစ်ဦးက ရွှေဖီမြေကို ပြောပါတယ်။
“မြေပြင်စစ်ကြောင်းတော့ မထိုးသေးဘူး။ မိုးမိတ်မြို့အပြင် အုန်းကြောကျေးရွာကနေ ၄ မိုင်ဘက်ကို ဒရုန်းနဲ့ ဗုံးဆက်တိုက် ကြဲနေတယ်။ မြစ်ဆုံဘက်ကို ထိုးလာနိုင်တယ်”
မြစ်ဆုံရွာဟာ မိုးမိတ်နဲ့ မဘိမ်းမြို့နယ်ကြားမှာ တည်ရှိပြီး ကချင်တပ်မတော်- KIA၊ ကျောင်းသားတပ်မတော်- ABSDF နဲ့ တော်လှန်ရေးတပ်တွေ ထိန်းချုပ်ထားတဲ့နေရာ ဖြစ်ပါတယ်။
စစ်တပ်ဘက်က မြစ်ဆုံရွာကို ထိန်းချုပ်နိုင်ခဲ့ရင် KIA ထိန်းချုပ်ထားတဲ့ မဘိမ်းမြို့နယ်ဘက် စစ်ရေး ဦးတည်လာနိုင်တယ်လို့ မိုးမိတ်အခြေစိုက် တော်လှန်ရေးတပ်ဖွဲ့ဝင်တစ်ဦးက ပြောပါတယ်။
“မြစ်ဆုံမှာ ရွှေလုပ်ကွက်တွေရှိတော့ စကစဘက် ပြန်ရအောင် တိုက်မယ် သဘောရှိတယ်။ အခုအခြေအနေမှာ KIA ဘက်က မဘိမ်းဘက်အထိ ဆုတ်ခွာရနိုင်တယ်”
စစ်ရေးအရ အရေးပါတဲ့ မိုးမိတ်-တွင်းငယ်လမ်းပိုင်းကို စစ်တပ်ဘက်က ၁ လနီးပါးကြာ တိုက်ခိုက်ပြီးနောက် ပြီးခဲ့တဲ့ မတ်လ ၂၄ ရက်မှာ ထိန်းချုပ်နိုင်ခဲ့တာပဲ ဖြစ်ပါတယ်။
တရုတ်နိုင်ငံရဲ့ ကြားဝင်စေ့စပ်မှုနဲ့ ပြီးခဲ့တဲ့ နိုဝင်ဘာလကုန်မှာ တအာင်းတပ်မတော်- PSLF/TNLA ထိန်းချုပ်ထားတဲ့ မိုးကုတ်နဲ့ မိုးမိတ်မြို့ကို စစ်တပ်ထံ ပြန်လည် လွှဲပြောင်းပေးခဲ့ပြီး မိုးမိတ်မြို့မှာတော့ ၄ လနီးပါး ကြာတဲ့အထိ အုပ်ချုပ်ရေးတွေ မလည်ပတ်နိုင်သေးပါဘူး။
မိုးကုတ်နဲ့မိုးမိတ်မြို့ကို စစ်တပ် ပြန်ရပြီးနောက် မန္တလေးတိုင်းအတွင်းရှိ နေရာတွေကို ဆက်တိုက် ထိုးစစ်ဆင်တိုက်ခိုက်နေပြီး တော်လှန်ရေးတပ်တွေဘက်က နယ်မြေတွေ ဆက်တိုက် လက်လွှတ်နေရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
