ရွှေဖီမြေ၊ ဇူလိုင် ၂၆ ရက်
အမျိုးသားဒီမိုကရေတစ်မဟာမိတ်တပ်မတော် (NDAA) ထိန်းချုပ်ထားတဲ့ ရှမ်းအရှေ့ မိုင်းလားမြို့ကနေ တရုတ်နိုင်ငံ ကျင်ဟုန်မြို့ထဲ တရားမဝင် ဝင်ရောက်အလုပ်လုပ်ကိုင်နေတဲ့ မြန်မာနိုင်ငံသား တစ်ထောင်ကျော်ကို တရုတ်ရဲတွေက ဖမ်းဆီးပြီး ပြန်ပို့ခဲ့တယ်လို့ ရွှေဖီမြေက စုံစမ်းသိရှိရပါတယ်။
ပြီးခဲ့တဲ့ ဇူလိုင် ၁၈ ရက်ကစပြီး ကျင်ဟုန်မြို့မှာ တရားမဝင် ဝင်ရောက်လာတဲ့ မြန်မာနိုင်ငံသားတွေကို တရုတ်ရဲတွေက ဆက်တိုက်ဖမ်းဆီးခဲ့ပြီး မိုင်းလားတပ်ကို လွှဲပြောင်းပေးခဲ့တာ ဖြစ်ပါတယ်။
ကျင်ဟုန်မြို့မှာ မြန်မာနိုင်ငံသားအချင်းချင်း ရန်ဖြစ်ပွားတာ၊ အလုပ်အကိုင်အဆင်မပြေတာနဲ့ လူမှုရေးကိစ္စတွေကြောင့် ကိုယ့်ကိုယ်ကို အဆုံးစီရင်တာတွေအပြင် လူသတ်မှုတွေ ဖြစ်ပွားနေတာကြောင့် တရုတ်ရဲတွေက ဖမ်းဆီးစစ်ဆေးတာတွေ ပိုလုပ်လာတယ်လို့ အလုပ်သမားတွေကို ကူညီဆောင်ရွက်ပေးနေသူတစ်ဦးက ရွှေဖီမြေကို ပြောပါတယ်။
“အသုတ်လိုက် မြန်မာဘက်ပြန်ပို့တာ ၆ ကြိမ်ရှိပြီ။ လူပေါင်း ၁,၀၀၀ ကျော်ပေါ့။ ကျင်ဟုန်မှာ အလုပ်လာလုပ်တဲ့သူတွေ လူမျိုးစုံတယ်။ အချင်းချင်းကြား ရန်ဖြစ်တာ၊ အရက်သေစာသောက်ပြီး မူးယစ်ရမ်းကားတာတွေကြောင့် တရုတ်တွေက ပိုဖမ်းလာတယ်” လို့ ဆိုပါတယ်။
တရုတ်ရဲ့ ဖမ်းဆီးမှုတွေကြောင့် မြန်မာနိုင်ငံသားတချို့ဟာ မြန်မာဘက်ကို ပွဲစားကနေတစ်ဆင့် ထွက်ပြေးနေကြပြီး ထွက်ပြေးနေစဉ် တရုတ်ရဲရဲ့ ဖမ်းဆီးတာကို ခံရသူတွေလည်း ရှိတယ်လို့ ၎င်းက ဆက်ပြောပါတယ်။
လက်ရှိ ကျင်ဟုန်မြို့မှာ တရားမဝင် ဝင်ရောက်လာတဲ့ မြန်မာနိုင်ငံသား ၇,၀၀၀ ကျော်ရှိပြီး တရုတ်ရဲတွေက ဖမ်းဆီးမှုတွေ ဆက်လုပ်နေတယ်လို့ အလုပ်သမားတွေကို ကူညီဆောင်ရွက်နေသူတွေက ဆိုကြပါတယ်။
တစ်ဖက်မှာလည်း တရုတ်ဘက်က မိုင်းလားတပ်ထံ လွှဲပြောင်းပေးခံရသူတွေကို စစ်ကောင်စီထံ စစ်မှုထမ်းဖို့ လွှဲပြောင်းပေးနေတယ်လို့ ကျင်ဟုန်မြို့မှာ အလုပ်လုပ်ကိုင်နေသူတွေက ပြောကြပြီး လူငယ်တွေကြား စိုးရိမ်မှုတွေ မြင့်တက်နေကြပါတယ်။
အကူအညီဆောင်ရွက်ပေးနေသူတွေကတော့ ကျင်ဟုန်မှာ မြန်မာအလုပ်သမားတွေကို တရားဝင် အလုပ်လုပ်ကိုင်ခွင့်ရဖို့ ကြိုးစားဆောင်ရွက်နေတယ်လို့ ပြောပါတယ်။
မြန်မာနိုင်ငံမှာ အလုပ်အကိုင်ရှားပါးမှုနဲ့ စစ်ကောင်စီတပ်ရဲ့ အတင်းအဓမ္မ တပ်သားစုဆောင်းတာတွေကြောင့် လူငယ်အများစုဟာ ပြည်ပနိုင်ငံတွေမှာ အန္တရာယ်ကြား သွားရောက်အလုပ်လုပ်ကိုင်နေကြရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
