ဝတ်ရည်၊ မေလ ၄ ရက်၊ ဖားကန့်
ကချင်ပြည်နယ် ဖားကန့်မြို့မှာ တိုက်ပွဲတွေ ပြင်းထန်နေပြီး စစ်ကောင်စီတပ်ရဲ့ လက်နက်ကြီး ပစ်ခတ်မှုကြောင့် ထိခိုက်ဒဏ်ရာ ရရှိသူတွေလည်း ရှိနေတယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
ဒီနေ့ မေလ ၄ ရက် မနက်ပိုင်းက လုံးခင်းကျေးရွာမှာ စစ်ကောင်စီတပ်နဲ့ KIA တော်လှန်ရေး ပူးပေါင်းတပ်တွေအကြား တိုက်ပွဲပြင်းထန်ခဲ့တာဖြစ်ပြီး တိုက်ပွဲကြား ပိတ်မိနေတဲ့ ဒေသခံတချို့လည်း ရှိနေတယ်လို့ ဆိုပါတယ်။
ဒေသခံအမျိုးသားတစ်ဦးက “တိုက်ပွဲက မနက်အစောပိုင်းတုန်းက စဖြစ်ကြတာ။ လက်နက်ကြီးထိတဲ့သူတွေလည်း ရှိနေတယ်။ ပြီးတော့ တိုက်ပွဲကြားမှာ ပိတ်မိနေသေးတဲ့ သူတွေလည်း ရှိနေတာ။ လေကြောင်းကနေလည်း တိုက်ခိုက်လာမှာ ကြောက်နေရတာ” လို့ ရွှေဖီမြေကို ပြောပါတယ်။
ဒီမနက် ၈ နာရီခွဲမှာလည်း ဖားကန့်ဗျူဟာကုန်းမှာ တပ်စွဲထားတဲ့ စစ်ကောင်စီတပ်က လုံးခင်းကျေးရွာနဲ့ လယ်ပြင်ကျေးရွာထဲကို လက်နက်ကြီး ပစ်ခတ်ခဲ့တာကြောင့် ဒေသခံ ၂ ဦး ထိမှန်ဒဏ်ရာရရှိခဲ့တယ်လို့ သိရပါတယ်။
စစ်ကောင်စီတပ်ရဲ့ စခန်းတွေကို KIA၊ KPDF က တိုက်ခိုက်နေတာကြောင့် တိုက်ပွဲပြင်းပြင်းထန်ထန် ဖြစ်နေပြီး ဒေသခံတွေရဲ့ နေအိမ်ပေါ် ကို လက်နက်ကြီး ကျရောက်ပေါက်ကွဲတာတွေ ရှိတယ်လို့ ဒေသခံတစ်ဦးက ပြောပါတယ်။
ဖားကန့်မြို့နယ်က ဒေသခံလူထုတွေအနေနဲ့လည်း စစ်ကောင်စီတပ်ရဲ့ လေကြောင်းရန်ကို အထူးဂရုပြု နေထိုင်ကြဖို့ကိုလည်း တော်လှန်ရေးတပ်ဖွဲ့ဝင်တွေက တိုက်တွန်းထားပါတယ်။
စစ်တပ်ဘက်က အင်အားဖြည့်တင်းထားတဲ့ ဖားကန့် ကားလမ်းပိုင်းကိုလည်း KIAက ပြီးခဲ့တဲ့ ဧပြီ ၂၂ရက်ကစပြီး ရက်အကန့်အသတ်မရှိ ယာယီပိတ်ထားပြီး လုံခြုံရေးအခြေအနေအရ ယာယီပိတ်ထားတာဖြစ်လို့ ခရီးသွားဒေသခံတွေလည်း လိုက်နာကြဖို့ သတိပေးထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
