ရွှေဖီမြေ၊ မေလ ၄ ရက်၊ လားရှိုး
စစ်ကောင်စီတပ် ထိန်းချုပ်ထားတဲ့ လားရှိုးမြို့မှာ အမျိုးသား ၄ ဦးက ဆိုင်ကယ် မောင်းလာတဲ့ အမျိုးသမီးတစ်ဦးရဲ့ ဆိုင်ကယ်နဲ့ငွေကို ဓားထောက်ပြီး လုယက်သွားကြောင်း ရပ်ကွက်နေ အမျိုးသမီးရဲ့ ပြောပြချက်အရ သိရပါတယ်။
မနေ့ မေလ ၃ ရက် ညနေ ၄ နာရီ ဝန်းကျင်မှာ လားရှိုးမြို့ ရပ်ကွက် ၁ ပါရမီလမ်းသွယ် ၆ အနီးမှာ ဆိုင်ကယ် စီးလာတဲ့ အမျိုးသမီးတစ်ဦးကို အသက် ၂၀ ကျော်အရွယ် အမျိုးသား ၄ ဦးက ဓားထောက်ပြီး ဆိုင်ကယ် လုယူသွားခဲ့တာပါ။
ရပ်ကွက်နေ အမျိုးသမီးက “အဲနေရာတဝိုက်က လူပြတ်တယ်လေ။ ဓား ပြပြီး အတင်းလုတာ။ တော်သေးတယ် လူတော့ ဘာမှမဖြစ်သွားဘူး” လို့ ပြောပါတယ်။
လုယက်ခံရတဲ့ ဆိုင်ကယ်ဟာ CZI ဆိုင်ကယ် အနီရောင်ဖြစ်ပြီး တူးဘောက်အတွင်းမှာလည်း ငွေ သိန်း ၁၀၀ ပါသွားကြောင်း လုယက်ခံရသူ အမျိုးသမီးက ပြောဆိုပါတယ်။
မေလ ၂ ရက် မနက် ၉ နာရီကလည်း လားရှိုးမြို့ ရပ်ကွက် ၁ က အလှကုန်ဆိုင်တစ်ဆိုင်မှာ အမျိုးသား ၄ ဦးက ဆိုင်ပိုင်ရှင်ကို ဓားပြတိုက်ဖို့ ကြိုးစားခဲ့ပေမဲ့ ထွက်ပြေးလွတ်မြောက်ခဲ့ပါတယ်။
အလားတူဖြစ်စဉ်မျိုး လားရှိုးမြို့မှာ မကြာခဏ ဖြစ်ပွားနေသလို ခိုးမှု၊ လုယက်မှုနဲ့ ပြန်ပေးဆွဲမှုတွေလည်း ဖြစ်ပွားနေပေမဲ့ သက်ဆိုင်ရာက တရားခံကို ဖမ်းမိနိုင်တာ မရှိခဲ့ကြောင်း ဒေသခံတွေရဲ့ ပြောပြချက်အရ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
