ဝတ်ရည်၊ ဖေဖော်ဝါရီ ၁၀ ရက်၊ ဖားကန့်
တိုက်ပွဲတွေ ဆက်လက်ပြင်းထန်နေတဲ့ ကချင်ပြည်နယ် ဖားကန့်မြို့မှာ ပေါက်ကွဲမှု ဖြစ်ပွါးခဲ့တာကြောင့် ဒေသခံ ၃ ဦး ထိမှန်ဒဏ်ရာရရှိခဲ့တယ်လို့ ဒေသခံအမျိုးသားတစ်ဦးက ရွှေဖီမြေကို ပြောပါတယ်။
ဒီနေ့ ဖေဖော်ဝါရီ ၁၀ ရက်မှာ ဖားကန့်မြို့ လုံးခင်းကျေးရွာအုပ်စု မှော်စီစာကျေးရွာလမ်းပိုင်းမှာ ပေါက်ကွဲမှုဖြစ်ပွါးခဲ့တာဖြစ်ပြီး အမျိုးသမီး ၂ ဦးနဲ့ အမျိုးသား ၁ ဦးတို့ ထိမှန်ဒဏ်ရာရရှိခဲ့တယ်လို့ ဆိုပါတယ်။
ဒါ့အပြင် ဒီနေ့ ဖေဖော်ဝါရီ ၁၀ ရက် နေ့လယ် ၁ နာရီ ၄၅ မိနစ်မှာလည်း ဖားကန့်မြို့ မရှီကထောင်ရပ်ကွက်ကို စစ်ကောင်စီတပ်က လေကြောင်းကနေ ဗုံးကြဲချတိုက်ခိုက်ခဲ့တယ်လို့ သိရပါတယ်။
“ဒီနေ့မနက်တော့ မရှီကထောင်ဘက်မှာ တိုက်ပွဲဖြစ်တာ မရှိသေးဘူး။ လေကြောင်းကနေ ဗုံးကြဲပြီးတော့ တပ်မကုန်းကနေ လက်နက်ကြီးအချက် ၂၀ လုံး လောက် ပစ်သွားတယ်။ ပြီးမှ လက်နက်ငယ်အသံတွေ ကြားရတယ်။ လေကြောင်းကနေပဲ စိုးရိမ်နေရတာပါ။ စစ်မြေပြင်မှာ စစ်ကြောင်းထိုးရဖို့အတွက် လေကြောင်းကနေ တိုက်ခိုက်နေတာပါ” လို့ ဒေသခံအမျိုးသားတစ်ဦးက ပြောပါတယ်။
ပြီးခဲ့တဲ့ ဖေဖော်ဝါရီ ၇ ရက်ကလည်း စစ်ကောင်စီတပ်နဲ့ KIA ပူးပေါင်းတပ်တွေ တိုက်ပွဲပြင်းထန်နေတဲ့ ဖားကန့်မြို့ မရှီကထောင်ရပ်ကွက်နဲ့ ကလပ်ကုန်းမှာ လက်နက်ကြီး ကျရောက်ပေါက်ကွဲခဲ့တာကြောင့် ဒေသခံ ၃ ဦး ဒဏ်ရာရရှိခဲ့ပါတယ်။
ဖားကန့်မှာ ပြီးခဲ့တဲ့ ဇန်နဝါရီ ၂၄ ရက်ကနေ ဒီနေ့ ဖေဖော်ဝါရီ ၁၀ ရက်အထိ တိုက်ပွဲတွေ ပြင်းထန်နေပြီး ဒေသခံ ထိခိုက်သေဆုံးမှုတွေလည်း နေ့စဉ်ရက်ဆက် ရှိနေတယ်လို့ ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
