မြတ်နိုး၊ မေ ၃၀
ဖားကန့်မြို့နယ် လုံးခင်း၊ မှော်စီစာ၊ နမ္မဖြစ်နဲ့ အနီးပတ်ဝန်းကျင် ကျေးရွာတွေမှာ လတ်တလော ဓားပြတိုက်မှု၊ ခြိမ်းခြောက်လုယက်မှုနဲ့ အကြမ်းဖက်မှုတွေ ဆက်တိုက်ဖြစ်ပွားလာနေပြီး ဒေသခံပြည်သူတွေ အထူးစိုးရိမ်နေကြရကြောင်း ဒေသခံတွေဆီက သိရပါတယ်။
အခု မေလနောက်ဆုံးပတ်အတွင်း လုံးခင်း၊ မှော်စီစာ၊ နမ္မဖြစ်လမ်းပိုင်းတွေမှာ သေနတ်ကိုင်အဖွဲ့တွေက လမ်းသွားလမ်းလာ ကား၊ ဆိုင်ကယ်တွေကို တားဆီးစစ်ဆေးသလိုလုပ်ပြီး ငွေကြေး၊ ကျောက်၊ ဖုန်းနဲ့ တန်ဖိုးရှိပစ္စည်းတွေ လုယက်ယူဆောင်သွားတဲ့ ဖြစ်စဉ်တွေ ဆက်တိုက်ဖြစ်ပေါ်နေတယ်လို့ ဒေသခံတွေက ပြောပါတယ်။
ပြီးခဲ့တဲ့ မေလ ၂၈ ရက် မနက်ပိုင်းကလည်း လုံးခင်း ရပ်ကွက် ၃မှာရှိတဲ့ ဦးဂျိုးဇက်ရဲ့ ဝက်ခုံကို သေနတ်ကိုင်ဓားပြတွေ ဝင်ရောက်လုယက်ခဲ့ပြီး ငွေကျပ် သိန်း ၁၂၀ ခန့် ပါသွားတယ်လို့ ဒေသခံ အမျိုးသား တစ်ဦးက ပြောပါတယ်။
“ကျောက်ရောင်းပြန်လာတဲ့ ဒေသခံတချို့လည်း မှော်စီစာဘက်မှာ သေနတ်နဲ့ချိန်ပြီး ငွေကြေးလုယူခံခဲ့ရတာတွေလည်း ကြားနေရတယ်” လို့ သူက ထပ်ပြောပြပါတယ်။
လုံးခင်း၊ မှော်စီစာနဲ့ နမ္မဖြစ်အဝင်လမ်းပိုင်းတွေဟာ လတ်တလော ဓားပြတိုက်မှုအများဆုံး ဖြစ်နေတဲ့ နေရာတွေဖြစ်ပြီး နေ့ခင်းကြောင်တောင် လုယက်မှုတွေရှိသလို ညဘက် ကျောက်ဝိုင်းပြန်ချိန်တွေမှာလည်း လုယက်မှုတွေ ပိုဆိုးလာနေတယ်လို့ ပြောပါတယ်။
တချို့ဖြစ်စဉ်တွေမှာ ငွေသားမပါသူတွေကို KPay ကနေ ငွေလွှဲခိုင်းတာ၊ ဖုန်း Password တွေ ဖွင့်ခိုင်းတာမျိုးအထိ ရှိနေတယ်လို့ နောက်ထပ် ဒေသခံ အမျိုးသား တစ်ဦးက ပြောပါတယ်။
“ဓားပြ တိုက်ခံရတဲ့သူတွေ အများကြီးရှိတယ်။ တချို့က ကြောက်လို့ မပြောရဲကြဘူး။ သတင်းထွက်ရင် နောက်ဆက်တွဲပြဿနာဖြစ်မှာစိုးလို့ ငြိမ်နေကြတာများတယ်” လို့ သူက ပြောပါတယ်။
လက်ရှိဖြစ်ပွားနေတဲ့ လုယက်မှုတွေကို ဘယ်အဖွဲ့က ကျူးလွန်နေတာလဲဆိုတာ ဒေသခံတွေကြား အမျိုးမျိုးပြောဆိုနေကြတယ်လို့ ဆိုပါတယ်။
လုံးခင်းနဲ့ မှော်စီစာဘက်က ဖြစ်စဉ်အများစုကို စစ်ကောင်စီတပ်နဲ့ သူတို့နဲ့နီးစပ်တဲ့ လက်နက်ကိုင်အဖွဲ့တွေ လုပ်ဆောင်နေတာလို့ ဒေသခံအချို့က စွပ်စွဲပြောဆိုနေကြပါတယ်။
တစ်ဖက်မှာလည်း KIA ထိန်းချုပ်နယ်မြေအဖြစ် သတ်မှတ်ခံထားရတဲ့ ဆိုင်းတောင်-မှော်ရှန် ရေကြည်ကုန်းဒေသမှာ မေလ ၂၅ ရက်ညက လောပန်းညီအစ်ကို သုံးဦးပိုင် နေအိမ်တစ်လုံး ဓားပြတိုက်ခံခဲ့ရပြီး ငွေကြေးနဲ့ ပစ္စည်းများသာမက စာရွက်စာတမ်းအချို့ မီးရှို့ဖျက်ဆီးခံခဲ့ရတယ်လို့ ဒေသခံတွေက ပြောပါတယ်။
ဒါကြောင့် ဖားကန့်ဒေသအတွင်း စစ်ကောင်စီထိန်းချုပ်နယ်မြေ၊ KIA ထိန်းချုပ်နယ်မြေ မခွဲခြားဘဲ ဓားပြတိုက်မှုတွေ ဖြစ်ပွားလာနေတဲ့အတွက် ပြည်သူတွေက လုံခြုံရေးအပေါ် ပိုမိုစိုးရိမ်နေကြပြီး ကျူးလွန်သူတွေကို ဖော်ထုတ်အရေးယူပေးဖို့ လိုအပ်နေတယ်လို့ ဒေသခံတွေက တောင်းဆိုနေကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
