ရွှေဖီမြေ၊ ဇူလိုင် ၁၆ ရက်၊ လားရှိုး
စစ်ကောင်စီတပ် ပြန်လည်ထိန်းချုပ်ထားတဲ့ ရှမ်းမြောက် လားရှိုးမြို့၊ ရပ်ကွက် (၇) မှာ မြို့ခံတွေရဲ့ ကားကို ခိုးယူနေတဲ့ အမျိုးသားတစ်ဦးကို မြို့ခံတွေ ဝိုင်းဝန်းဖမ်းဆီးနိုင်ခဲ့တယ်လို့ လားရှိုးမြို့ခံတစ်ဦးက ရွှေဖီမြေကို ပြောပါတယ်။
“အဲဒီသူခိုးကို ရပ်ကွက် (၇) မှာ ဖမ်းမိတာ။ ဖမ်းတဲ့အချိန် ပြောင်စပ်စပ် ပြန်လုပ်သေးတယ်။ လားရှိုးမှာ သူခိုးက အုပ်စုလိုက် အများကြီးပဲ။ စကစ ဖမ်းလည်း ပြန်လွှတ်တာပဲ” လို့ ဆိုပါတယ်။
မြို့ခံတွေ ဖမ်းဆီးရမိတဲ့ အမျိုးသားကို စစ်ကောင်စီရဲ့ လက်အောက်ခံရဲထံ အပ်နှံထားပြီး သူခိုးဟာ စစ်ကောင်စီတပ်ဖွဲ့ဝင်ဖြစ်တယ်လို့ ပြောဆိုမှုတွေ ရှိနေပေမယ့် ရွှေဖီမြေက သီးခြားအတည်ပြုနိုင်တာ မရှိသေးပါဘူး။
လားရှိုးမြို့ကို စစ်ကောင်စီတပ် ပြန်လည်ထိန်းချုပ်ပြီးနောက် ကားခိုးယူခံရတဲ့ ဖြစ်စဉ်တွေ မကြာခဏ ဖြစ်ပွားနေပြီး စစ်ကောင်စီဘက်က ထိရောက်စွာ အရေးယူနိုင်တာ မရှိဘူးလို့ မြို့ခံတွေက ဆိုကြပါတယ်။
ဒါ့အပြင် ဓားပြတိုက်မှု၊ လုယက်မှု၊ လူသတ်မှုနဲ့ ပြန်ပေးဆွဲမှုတွေ မကြာခဏ ဖြစ်ပွားနေပေမယ့် စစ်ကောင်စီဘက်က အရေးယူနိုင်ခြင်း မရှိတဲ့အပေါ် မြို့ခံတွေက ဝေဖန်နေကြပါတယ်။
ပြီးခဲ့တဲ့ ဇူလိုင် ၇ ရက် ညနေပိုင်းမှာလည်း ရပ်ကွက် (၅) ရှိ နေအိမ်တစ်အိမ်မှာ အမျိုးသား ၃ ဦးက ဆိုင်ကယ်ကို လုယက်ဖို့ ကြိုးစားစဉ် အိမ်ရှင်ဖြစ်သူက ဓားနဲ့ လိုက်လံခုတ်သတ်ခဲ့ရာ တစ်ဦး သေဆုံးခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
