ပိုႈလဘား၊ ကျံရ်ဇူန်လည် ဆငည်း 8၊ တာန်ယာန်
ကဝ်အီမိုႈဖုင်ပျံတ်ငံရ်အယာန် ခေဲင်လှံင်တာန်ယာန်နီန်အူအီး က္လာင်းတဖုင်ဆျှိုည်ဖီမျေဒါႈ ပကပီုန်ဆျှံမ်ကဒါႇပိုည် ခေဲင်လှံင်တာန်ယာန်နီန် ချှရိုအူပါး ဇောႈယံမ်း စိူမ်ယံမ်းတအိုမ်အောႏ။
ခည်ကျံရ်ဇူန်လည် ဆငည်း 6 ဘံန်ဆံန်ကပံတ် 3 နြီဒိူန် ပကီုင်းတာန်ယာန် ဒီခြံင်အိုမ်ဖိုင်ချမ်း အ်ုန်အီဂေါည် ခေဲင်ဇံင် 6 ကာည်း ဇံင် 2 နီန် ချှရိုအူပါး ယိူဝ်ႇတအ်ုန်လီပ်ဒါအိုမ်နီန် စီစိူမ်ယံမ်းတအိုမ်အောႏ။
“ပပ္လေါင်အိုမ်ဒီန် ချှရိုကဲဟာဝ်း 5 ပါး။ 4 ပါးစီဒါႈအိုမ်ဒါင်း အာဝ်ယစိလီပ်ဒါ။ ဆာ်မိုႈအူပါးဒီန် အ်ုန်ႎဲရ်လီပ်ပွံတ်အူလိူဝ်ႈ ခေဲင်အိုမ်ဒီန်။ တောပ်ဒေဘားအ်ုန်မာ်အာဝ်ဘိူန်းယာ့်။ ကဲဟြာင်းက္လာင်းဒေဲႈတယဲ ဘံန်ရောတ် ဇူန်အံပ် 5 နြီလေႈ အိုည်ကိူရ်မနေတ်။ ယဲဟာဝ်းဟြီုက်အေ့ အာဝ်ယိူဝ်းစိ။ အဒိူဝ်မာ် ယဲဟာဝ်းဟြီုက်အေ့ အာဝ်ယိူဝ်းစိ တိုပိုင်းခန္ဓာယံမ်းအ်ုန်။ ဘံန်ရောတ် စူန်အံပ်စိယိူဝ်းလာ်”
ကဲဒါႈ ချှရိုအီယံမ်းဟာဝ်းအ်ုန်နီန် ဘိူန်းအဆာက် 11 ဆန်ုမ် အ်ုန်ဂေါည်ခေဲင်ကျောင်ဝေဠုဝန် ခေဲင််ကီုင်းတာန်ယာန်နီန်အောႏ။
တိုပိုင်းခန္ဓာယံမ်း ချှရိုပါးအီယံမ်းဟာဝ်းနီန်မိုႈ ဖုင်ပျံတ်ငံရ်သန္ဓေ၊ ဖုင်ပျံတ်ငံရ်အယာန် ကာည်း ကောန်တဘိုက်တာန်ယာန်ကဲ ကစုကပိုမ်ဖါ်ႈဒေဒါ တိုန်းဟာဝ်း ပယုင်ဆနံမ်ဒါင်းအောႏ။
ကဝ်အီကပ္လါႇဆဒါင် – လိုည်ပိုႈဆပေ
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
