မာည်းရူပ၊ ကျံရ်အေပ်ြုရ် ဆငည်း 10၊ လာဆေဝ်
ဖုင်ယဲဆျှိုည်ဖီမျေတခေါရ်နံပ်မိုႈတ ပလိက်ကဲအီဂေါည်ခြူမ်တည်း တံပ်ကညာအာဏာဆီုက်ဇေဝ်ကဲနီန် စွဲဖါ်ႈကောန်တဘိုက်အာရ်အီး ဂါရ်အီကဇိူရ်ႈကယံင်းဆဲင်ကယ် ပကီုင်းလာဆေဝ် ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန် မဲႈမောကံပ်ယံမ်းဘီရ်ဟာဝ်းအောႏ။
ကောန်အီမာည်း ကဝ်အီဂေါည်ပလာဆေဝ်နီန်အူအီး က္လာင်းဒါႈ ခည်ကျံရ်အေပ်ြုရ် စူန်မှိူဝ် ဆငည်း 8ဒိူန် ဖုင်ပလိက် စနဲ (1) လာဆေဝ်ကဲ ဒေဲႈတိုည်းဟာဝ်းဖါ်ႈ ကောန်အီမာည်း ဘိူန်းအဆာက် ကပံတ် 20ဆန်ုမ်လေႈ ဂါရ်အီကဇိူရ်ႈကယံင်းဆဲင်ကယ် ပဇံင် (7) ကီုင်းလာဆေဝ်နီန် မဲႈဖါ်ႈဂါရ် ပါ်ဆိူမ်အောႏ။
အ်ုန်ဒါႈ “တိုအီးဘြားကဲ ဒေဲႈယံင်းဆဲင်ကယ် ပဆဴင်ကဲ။ ကဲအာဝ်နံပ်လာ် မိုႈတမိုႈတိုအီးဘြား။ ဘံန်ကဲဟောည်ႇဇိူရ်ႈ ပလိက်ကဲမာ် တောပ်ဒေဲႈပွံတ်။ ဆာ်မိုႈအူအီး အ်ုန်ကတူႈပွံတ်ကဲမဲႈအ်ုန် ပါ်ဆိူမ်။ ကြောင်အ်ုန်ကံပ်ႎံင်းဒိုႇ။ ကံပ်ယံမ်းဘီရ်ဟာဝ်း”
ဂေါႇမိုႈဖုင်ပလိက်ကဲ ဟည်ဘိူန်းဒေတိုည်းဟာဝ်း တိုအီးဘြားဆဲင်ကယ်ကဲဒီန် ခည်ကျံရ်အေပ်ြုရ် ဆငည်း 9ဒိူန် စီပဲန်ကဲပ္လေႈလေႈ ကောန်တဘိုက်အာရ်အီးဂါရ်ဒီန်အောႏ။
ဂေါႇဘံန်းမဲႈ ဖုင်ပလိက်တံပ်ကညာအာဏာဆီုက်ဇေဝ်ကဲ ကောန်တဘိုက် 2အီး ဂါရ်အီ ကတူႈကဲစွဲဒါႈမိုႈတိုအီးဘြားနီန် ဟည်ကတူႈဟာဝ်းဆနံမ်းတိုပိုင်းဂါရ်အောႏ။
တိုအီးခေဲင်အရာပ်ကဲ က္လာင်းတဆျှိုည်ဖီမျေဒါႈ ဘံန်ဟောည်ႇထိင်ခြဲအူန်း တံပ်ကညာအာဏာဆီုက်ဇေဝ်ကဲတ ကီုင်းလာဆေဝ်နီန် ဆဲႈဒါႇအီဒါခံင်မဝ်းနီန် ဂီုန်းဒေဲႈ အမှုဘြား၊ အမှုစိုန်၊ အမှုမှာတ်မာ် ဂေါည်ဂေါည်ပဲန်ဒေဲႈအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
