လိုည်းဇူန်မိုး၊ ကျံရ်မာချှ် ဆငည်း 27၊ အေဲမ်ကိုက်
ဘိူန်းအယ်နံပ်တောပ်ဘည်က္လာင်း တိုအီးအရာပ်ကဲဒါႈ ပကပီုန်ဆျှံမ် ကဒါႇပိူည် ခေဲင်ကီုင်းအေဲမ်ကိုက်နီန် ဂေါႇမိုႈဘျုင်ဒရုင်နီန် ပဲန်ပဒူႈခေဲင်လူမ် တီုင်ကောန်အီပ်ုန်နီန် ကောန်ကညောမ် 2 အီးကတူႈဖေး ကာည်း ကောန်အီပ်ုန်အူအီး ကတူႈဖေးဘာတ်ဟာဝ်းအောႏ။
တိုအီးအရာပ် ကောန်အီပ်ုန်အူအီး က္လာင်းဒါႈ ခည်ကျံရ်မာချှ် ဆငည်း 25 ဘံန်ဆံန် ကပံတ် 12 နြီလေႈအိုည်ကိူရ်မနေတ်ဒိူန် ခိင်ဟာဝ်းဒေါကဲတ ဟေခေဲင်လူမ်တီုင်ကောန်အီပ်ုန်နီန် ဂေါႇမိုႈကဲငျားဒေတိူဝ်ႈကိုင် ဘျုင်ဒရုင် အီညှံမ်ပဒူႈနီန် ဂေါႇဘည်ဒီန် ပဲန်ဖါ်ႈပဒူႈ လဟာဝ်း ဆုကလျာ ဘိူန်းအဆာက် 10 ဆန်ုမ်၊ မောင်နိုင်မင်းထွန်း ဘိူန်းအဆာက် 13 ဆန်ုမ် ကာည်း ဒေါ်အေးရွှေ ဘိူန်းအဆာက် 63 ဆန်ုမ်အောႏ။
“ ကောန်ကညောမ်ကဲ ဟာဝ်းဒေါဟေ။ ခည်ပဲန်တပ္လေါည်ကတီုက်ကပဴင်နီန် ဘျုင်ဇောႈအူန်း ခေဲင်လူမ်နီန် အာရ်ပိုင်း ခိင်ဟာဝ်းဒေါကဲတဟေနီန်မာ်ငျားပွံတ်။ ပ်ုန်ဇောႈအူန်းအာရ်ပိုင်းဂါရ်ဒီန် အ်ုန်ကံပ်ကီုက်လိူည်ဖါ်ႈကိင်အ်ုန်။ အ်ုန်ဟည်ပဒူႈဟောည်ႇ အ်ုန်ကီုက်ဖါ်ႈကိင်နီန် ဒေါ်အေးရွှေမာ် ဟည်ကိုင်တိူရ်ႈ။ ကောန်ကညောမ်မာ် ဟည်တိူဝ်ႈကိုင်တိူရ်ႈဘိုး။ ဂါရ်ဟည်ဟောည်ႇကိုင်ဖါ်ႈ အ်ုန်စီဒါႈ အယ်ႎီရ်ခိင်ဒီန် ကောန်ကညောမ်ဒီန်စီ ႎီုန်လာ်ဘျုင်ဒီန် ခိင်ႎီုန်အ်ုန်စီပဲန်လာ်ပဒူႈ”
ဘိူန်းအယ်နံပ် ကဇေန်နီး ကဲတိုန်းအူန်း မောင်နိုင်မင်းထွန်း အ်ုန်အီကတူႈဖေးဘာတ်ကဆဝ်းနီန် ပယုင်ဆနံမ်ဒါင်း တေင်နီ ဆာ်မိုႈ မဆုကလျာ ကာည်း ဒေါင်အေးဆျှိုည်နီန်စီ နံင်ဒေဲႈပျလိူည် ပယုင်ဆနံမ်နီန် ဒါဆငည်းအောႏ။
ဘိူန်းအယ်နံပ် ဘာည်းလိူည်ဒီန် ခေဲင်လှံင်အေဲမ်ကိုက်နီန် ခေဲင်ရဝ်မန်ပိန်းကော်င်ခါးနီန်မာ် ခေဲင်လိုင်းခေဲင်ဂါင်ကဲ ဂီုည်မိူဝ်ႈအူန်း ဘျုင်ဒရုင် အီညှံမ်ပဒူႈနီန် 8 ပိုင်း ဂေါႇဘည်ဒီန် တိုအီးအရာပ်ကဲမှာန်းဒါႈ ဆိင်ဒဲႈအေ့ MNDAA ကဲဆာင်းလာင်းဒဲႈအောႏ။
ကဝ်အီကပ္လါႇဆဒါင် – လိုည်ပိုႈဆပေ
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
