မာည်းပါင်ပျော၊ ကျံရ်မာချှ် ဆငည်း 31၊ မိူင်းလား
ဘိူန်းအယ်တခေါရ်နံပ်တ ကဲအီရေဲန်ဇီုင်း ပမိူင်းလားကဲနီန်ဒါႈ ပကီုင်းမိူင်းလား ကပီုန်ဆျှံမ်ကဒါႇလေႈဆာင်ငည်းနီန် အိုမ်ပျြံင်ထာတ်ဟည်ကတ်ုတ်ဖါ်ႈ မောကံပ်အာဝ်ဘိူန်းဇိူရ်ႈအောႏ။
ကောန်အီပ်ုန် ကဝ်အီရေဲန်ဇီုင်းပမိူင်းလားနီန်အူအီး က္လာင်းတဆျှိုည်ဖီမျေဒါႈ မိုႈလိူည်ခေဲင်ကျံရ်မာချှ် နှားဖိုန်နီန် အိုမ်ပျြံင်ထာတ် ဟည်ကတ်ုတ်ဖါ်ႈ ခေဲင်ကီုင်းမိူင်းလား မောကံပ်ရောတ်ပွံတ် ခူရ်က္လာည်းအာဝ်ဘိူန်းဇိူရ်ႈအောႏ။
“ကဇေန်နီး ပမိူင်းလား မိုႈပွံတ်အာဝ်မိူဝ်ႈယာ့် အိုမ်ပျြံင်ထာတ်။ ယဲကံပ်ဟာဝ်းမာ် ကဲအာဝ်ဟံပ်ဒဲႈစိ။ ငေါႈခံန်အ်ုန် ဟိုက်အူန်း။ နှားအာည်ႇဒိူန် ယဲဟာဝ်းဟံပ်နိုက်ခေဲင်ဆဲင်ကယ် အူကြောင် မိုႈလိူည် 25ယူန် (ရိူန်းဘြာန် 15000) ဘျာလိူည်။ ကဇေန်နီး မိုႈပွံတ် 40ယူန် နံင်ဇောႈပွံတ်ကပံတ် (26000) ဘျာ”
မိူဝ်ႈဘိုးကောန်အီပ်ုန်အူအီး က္လာင်းတဆျှိုည်ဖီမျေဒါႈ ပကီုင်းမိူင်းလား အိုမ်ပျြံင်ထာတ်ကတ်ုတ်ဖါ်ႈ ဂေါႇအာဝ်ဘိူန်းဇိူရ်ႈ စီပဲန်ကဲအီဟာဝ်းရေဲန်ဇီုင်း ပမိူင်းလားကဲနီန် အာဝ်ဘယာ့်ကား၊ ဆဲင်ကယ် ကဲထံင်ထေဝ်ဟာဝ်းလိူည်ပဇီုင်း ဒါဇိူင်အောႏ။
ခည်ကျံရ်မာချှ် ဆငည်း 4ဒိူန် တောပ်ပည်ကုင်ကပိုမ်ဘြာန် ဆဒါင်ဂီုည်လေႈဒေဲႈ ဒါႈမိုႈခယ်ကဲက္လာင်းအူန်း ကနာည်နံင်ဇံင်းဆဲ့ ကဆီုဝ်ယံင်းဒဲႈကဲတအိုမ်ပျြံင်ထာတ် ကဒါႇကုင်အီဟံရ် ဘံန်ဟောည်ႇလေႈဒေဲႈဘေဲႇဒီန် ကဲမာ်ဇံင်းပွံတ် ဘည်တာင်တိုန်းအိုမ်ပျြံင်ထာတ်ကဲနီန် ခေဲင်လှံင်အီဂေါည်ကအူရ် ကုင်ခယ်ကာည်း ကုင်ကပိုမ်ဘြာန်ကဲနီန်အောႏ။
ကဇေန်နီး တောပ်ပည်ကပီုန်ဆျှံမ်ကဒါႇပိူည် ပမိူင်းလား ကဒါႇကပီုန်ဆျှံမ်ကဒါႇလေႈဆာင်ငည်း အ်ုန်အီမိုႈဒီပ်ုန်ထိင်ခြဲအူန်း UWSA ကဲမာ် ဟည်ကတူႈဒေဲႈဒိုႇ ဘည်ကတ်ုတ်အိုမ်ပျြံင်ထာတ်ကဲနီန်အောႏ။
ကဇေန်နီး ဆဴင်အိုမ်ပျြံင်ထာတ် ပကပီုန်ဆျှံမ်ကဒါႇပိူည်ကဲနီန် ကဒါႇဂီုန်း ဟည်ဘိအူန်းဖါ်ႈ ဘည်ဟိုက်ကဆဝ်း ငေါႈခံန်အိုမ်ပျြံင်ထာတ် အိုမ်ပျြံင်ထာတ်အူလီတာမာ် ယိူဝ်ႇပွံတ် 12000ဘျာ ဟိုက်ရောတ်ပွံတ်ဘံင် 20000ဘျာအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
