ပို့လဘား၊ ဧပြီ ၁ ရက်၊ နောင်ချို
စစ်ကောင်စီတပ် ပြန်လည်ထိန်းချုပ်ထားတဲ့ ရှမ်းမြောက် နောင်ချိုမြို့နယ် မတ်လွတ်ကျေးရွာက အမျိုးသမီးတစ်ဦးဟာ မိုင်းနင်းမိပြီး သေဆုံးသွားခဲ့တယ်လို့ ဖြစ်စဉ်သိရှိသူ အမျိုးသားတစ်ဦးက ပြောပါတယ်။
ပြီးခဲ့တဲ့ မတ်လ ၂၈ ရက်မှာ မတ်လွတ်ရွာက အသက် ၃၉ နှစ်အရွယ် ဒေါ်သီတာမွေးဆိုသူဟာ ၎င်းရဲ့ နေအိမ်အရှေ့ဘက်ရှိ လမ်းမကြီးဘေးမှာ လမ်းသန့်ရှင်းရေး လုပ်နေရင်း မိုင်း နင်းမိခဲ့တာလို့ အထက်ပါ အမျိုးသားက ပြောဆိုပါတယ်။
“အိမ်ဘေးမှာ သန့်ရှင်းရေး လုပ်နေတာ။ သူအဲမြေမြှုပ်မိုင်းကို ဂေါ်ပြားနဲ့ ခုတ်မိလိုက်တာ။ သူ့မျက်နှာ ထိတယ်။ ညာဘက်ခြေထောက် ပြတ်သွားပြီး သူလည်း အဲမှာပဲ ပွဲချင်းသေဆုံးသွားတာ”
အလားတူ ပြီးခဲ့တဲ့ မတ်လ ၂၁ ရက် နေ့လယ် ၂ နာရီဝန်းကျင်မှာလည်း နောင်တောရွာက အသက် ၅၇ နှစ်အရွယ် ဦးတင်လှိုင်ဆိုသူ တောင်းခမ်းဘက် ကြံ သွားတင်ရင်း မိုင်း နင်းမိပြီး ဒဏ်ရာ ရရှိခဲ့ပါတယ်။
မတ်လ ၉ ရက် နေ့လယ် ၃ နာရီဝန်းကျင်ကလည်း နောင်လိပ်ရွာက အသက် ၅၅ နှစ်အရွယ် ဦးသာနီဆိုသူဟာ နောင်လိပ်ရွာနဲ့ ၃ မိုင်ခန့်အကွာရှိ တောထဲတစ်နေရာမှာ ထင်းခုတ်နေရင်း မြေမြှုပ်မိုင်း နင်းမိခဲ့ပြီး ဘယ်ဖက်ခြေထောက် ဖြတ်လိုက်ရပါတယ်။
ရွှေဖီမြေက ပြုစုထားတဲ့ စာရင်းအရ ရှမ်းမြောက်မှာ ပြီးခဲ့တဲ့ ၂၀၂၅ ခုနှစ် တစ်နှစ်အတွင်း မြေမြှုပ်မိုင်းကြောင့် ကလေး ၂ ဦးအပါအဝင် ၉ ဦး သေဆုံးခဲ့ပြီး ကလေး ၆ ဦးအပါအဝင် ၂၇ ဦး ဒဏ်ရာ ရခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
