ဆျှိုည်ဖီမျေ၊ ကျံရ်မာချှ် ဆငည်း 24၊ လာဆေဝ်
ဇူႈပွံတ်ကျံရ်မာချှ် ဆငည်း 20 ဒိူန် ရောတ်စာ်မ်းခိင်ညှာကျံရ်မာချှ် ဆငည်း 23နီန် ဖုင်ငိူပ်မေန်းယာန်ကဲ ဂီုည်နှံက်ဒေတိုည်း မှာန်းရိူန်းတ ကားဆဴင်ကယ် ဆငည်းကိူပ်နီန် နံမ်ဘာတ်လျေဲဝ်၊ ဆငည်းလျေဲဝ်နီန် နံမ်ဘာတ်ကိူပ် ရအာည်ႇလူမ်ဇီုင်းကာန်ဆငါး အီဂေါည်ခေဲင်ဇံင် (1) ရီမ်းပြောအဝိုင်းပတ် ကီုင်းလာဆေဝ်အောႏ။
ကောန်အီမာည်း ကဝ်အီဂေါည်ခေဲင်လာဆေဝ်နီန်အူအီး က္လာင်းဒါႈ “ဆာ်မိုႈခေဲင်ခနားဒေင် ကဲအာဝ်တိုည်းစိ။ ကဲတောပ်ဒေရေဲန် ဘည်ရေဲန်ကီုင်းအီဟံရ်။ ပနီန် ဆာ်ကဲရေဲန်ဘည်ဒီန် အာဝ်ဘာည်းစိဒါႈ”
ဖုင်ငိူပ်မေန်းယာန်ကဲ မှာန်းဖါ်ႈရိူန်းတာမ် တကားအူကြောင် 5မှီုန်ဘျာကာည်း တဆဲင်ကယ်အူကြောင်နီန် 3မှီုန်ဘျာအောႏ။
မိူဝ်ႈဘိုးကောန်အီပ်ုန် ကဝ်အီဂေါည်ခေဲင်အရာပ်ဒီန်အူအီး က္လာင်းဒါႈ “ဘည်ရေဲန်ကဲနီန် မိုႈပွံတ်အာဝ်ဘာည်းဒါႈ ကနာည်ယဲအီမိုႈ ကူန်ရဝ်မာဂါင်။ ကဲဒါႈမိုႈ ကနာည်နံင်ခေတ်မေတ်ဒါ အိုမ်ပျြံင်ထာတ်ဒီးကော်။ ဘိူန်းအူန်းဒါရဒေင် ပ်ုန်ဟံရ်ကဘ္လာင်းဆာင်လာင်။ ရိူန်းမာ်အာဝ်လိုစိမှာန်း။ မိုႈလိူည်ကဲဒံင်ဒေ ရေဲန်ဟောမ်”
တောပ်ဘည်ကဆီုဝ်ကဆဲင် အီလိုလေႈ လျေဲဝ်ကာည်း ကိူပ်နီန် ဇူႈပွံတ်ကျံရ်မာချှ် ဆငည်း 7 ရောတ်စာ်မ်း ဆငည်း 13ဒိူန် ကဲပ္လဖါ်ႈ အ်ုန်မိုႈဇိုချီုင်ဒဲႈပိင်ငျာ မိူဝ်ႈအေ့ဘည်က္လာင်းဒေဲႈကဲတ ကနာည်နံင်လိုတောပ်ဒါခေါပ်ပြာႇ ယာန်ကိူပ်လျေဲဝ်ကာည်း ခေါပ်ပြာႇယာန်ကဲနီန်အောႏ။
ဂေါႇပ္လေါည်ကတီုက်ကပဴင် အရှေ့အလယ်ပိုင်းကဲ တံပ်ကညာအာဏာဆီုက်ဇေဝ် ဟည်ပ္လအူန်းဖါ်ႈ ကနာည်နံင်ဒါရဒေင် ဘည်နံင်လိုဟာဝ်းႎီရ် ယာန်ကိူပ်လျေဲဝ်ကဲ ခည်ကျံရ်မာချှ် ဆငည်း 3ဒိူန်အောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
