မာည်းပါင်ပျော၊ ကျံရ်မာချှ် ဆငည်း 29၊ မူစယ်
ကဲအီရေဲန်ဇီုင်းကာန် လံပ်ငိူပ်မေန်းကဲနီန် က္လာင်းဒါႈ ဂေါႇငေါႈခံန်အိုမ်ပျြံင်ထာတ်ကာည်း ဂေါႇမိုႈအိုမ်ပျြံင်ထာတ် ပကပီုန်ဆျှံမ်ကဒါႇပိူည်နီန် ကတ်ုတ်ဟာဝ်း စီပဲန်ဖုင်လံပ်ငိူပ်မေန်းကဲ ဂီုည်ကတူႈအူန်းကီန်းဒည်း ကဆီုဝ်ဇီုင်းကာန် လံပ်တိူဝ်ႈတိုန်း အီဆူနာကဲနီန်အောႏ။
တောပ်ဘည်လံပ်ကတ်ုမ်တို ကဝ်အီရေဲန်ဇီုင်းပ ဖုင်လံပ်ငိူပ်မေန်းနီန်အူလှေ က္လာင်းဒါႈ ဂေါႇမိုႈငေါႈခံန်အိုမ်ပျြံင်ထာတ်နီန် ဟိုက်ဒေဲႈ စီပဲန်စရိက်လံပ်တိူဝ်ႈတိုန်း အီဆူနာကဲနီန်မာ် ဟိုက်ဒေဲႈဖါ်ႈ အီဆူနာကဲ ဂီုည်ကတူႈအူန်းကီန်းဒည်းအောႏ။
အ်ုန်ဒါႈ “ဘံန်မိုႈငေါႈခံန်အိုမ်ပျြံင်ထာတ်ကဲနီန်ဟိုက် အ်ုန်အာဝ်ဘာည်းစိဒါႈ ကနာည်အီဆူနာကဲ။ ဆာ်အယ်ယိူဝ်ႇမူစယ် လေႈဟာဝ်းမာန်းတလေး ဒီဘြေ့အ်ုန် နံင်ဒိုႇကပံတ် 25ဆဲန်။ ခံင်မိုႈငေါႈဆနံမ်မာ်လို အ်ုန်ကီန်းအူန်း ပည်ကနာည်အာရ်ကဒါႇယာ့်”
အ်ုန်ဒါႈ ဘည်ကတ်ုတ်ဟာဝ်းအိုမ်ပျြံင်ထာတ်နီန် အ်ုန်ကီန်းမှယ် ဘည်ဟိုက်ဒေဲႈငေါႈခံန်အိုမ်ပျြံင်ထာတ်နီန်ယာ့်။
အ်ုန်ဆီုပ်ဒါႈဘိုး “ဘံန်မိုႈအိုမ်ပျြံင်ထာတ်ကတ်ုတ် အ်ုန်အာဝ်ရောတ်ဒီလိုရောတ်။ ဒီမှောနံင်ဟာဝ်းလာည်း အိုမ်ပျြံင်ထာတ်ကဲနီန်မာ် အာဝ်နံပ်နှဲန်စိ။ ခိင်အရေးဒါင်း ဆာ်အာဝ်ဘိူန်းအိုမ်ပျြံင်ထာတ် အာဝ်ဘယ်စိ ဟာဝ်းတိုန်းအီဆူနာကဲ ပယုင်ဆနံမ်ဒါင်းနီန် နှာင်းက်ြုပ်အခိင်”
အ်ုန်ဒါႈဘိုး တံင်ဒါင်းအ်ုန်မိုႈ ရဆိူမ် ခိင်လိုဟာဝ်းတိုန်းအီဆူနာ ဂေါႇမိုႈဆဴင်အိုမ်ပျြံင်ထာတ်ကဲ ဟည်ဘိ စီပဲန်အ်ုန်မှယ်မိူဝ်ႈကီန်းဒည်းအောႏ။
ကဇေန်နီး ဆဴင်အိုမ်ပျြံင်ထာတ်ကဲမံင်လှေ ဘိူည်ဟံပ်ဒဲႈတကား အီတောပ်အီဆူနာကဲနီန်မာ် ဂေါႇအိုမ်ပျြံင်ထာတ်ကတ်ုတ် စီပဲန်အ်ုန်မိူဝ်ႈကီန်းဒည်း ကဆီုဝ်လိုဟာဝ်းတိုန်း အီဆူနာကဲ ဒီဒိုန်းနီန်အောႏ။
ဂေါႇအိုမ်ပျြံင်ထာတ်ကတ်ုတ် စီပဲန်ဖုင်လံပ်ငိူပ်မေန်းကဲ မံင်ခ္လ အာဝ်တိုန်းယာ့်အီဆူနာကဲ ဒီဒိုင်း ကဲဂီုည်ရီန်းလိူည်ဒေ ရေဲန်ခေဲင်ကီုင်းကဲနီန်အောႏ။
ဖုင်လံပ်ငိူပ်မေန်းကဲနီန် ကဲတိုန်းဒဲႈဖါ်ႈ အီဆူနာတည်းဇိူင်ဖာက်၊ ရောဂါကျောက်ကပ်ကဲနီန် တောပ်ပည်အရာပ်အ်ုန် ပယုင်ဆနံမ်ဒါင်း ဂေါည်လိူည်ဘည်ဘာည်းအီဆူနာ ကဒါႇမာန်းတလေး၊ ယာန်ဂုင်၊ မျီတ်စီးနာဂဲကဲနီန်မာ် တိုန်းအေ့အောႏ။
ဘည်ကတ်ုတ်ဟာဝ်း အိုမ်ပျြံင်ထာတ် ကနာည်ကပီုန်ဆျှံမ်ကဒါႇပိူည်နီန် အ်ုန်မိုႈပွံတ်ကီန်းဒည်းအူလှေ ကဆီုဝ်တိူဝ်ႈတိုန်း အီဆူနာကဲနီန် နံင်နံင်ဆမာတိူဝ်လစံမ် လံပ်ကတ်ုမ်ကာည်း ဘည်ကနဲတ်ကမှည် ကနာည်အီဆူနာခေဲင်အရာပ်ကဲအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
