ဆျှိုည်ဖီမျေ၊ ကျံရ်ဇူန် ဆငည်း 5၊ အေဲမ်ကိုက်
တိုအီးခေဲင်အရာပ်ကဲ က္လာင်းတဆျှိုည်ဖီမျေဒါႈ တိုအီးဒါခံင်မဝ်းကဲ ဟည်ႎီရ်ဂီုန်းဒေဲႈဘိုး ခေဲင်လှံင်အေဲမ်ကိုက် ကပီုန်ဆျှံမ်ကဒါႇပိူည် အ်ုန်အီႎီရ်ရောတ်ဘိုး ခြူမ်တည်းတံပ်ကိုးကာင်း MNDAA ကဲနီန် ဘည်ကတူႈအီးတဘြား ဂြိုကဲနီန်မာ် ဟည်ရာမ်ယိူဝ်းဒေဲႈ ကစံပ်ကစံပ်ယာ့်အောႏ။
ကောန်အီမာည်း ကဝ်အီဂေါည်ခေဲင်အရာပ်နီန်အူအီး က္လာင်းဒါႈ တိုအီးဒါခံင်မဝ်းကဲနီန် ရာမ်ယိူဝ်းဂီုန်းဖါ်ႈခေဲင်ရဝ် ဆဲႈဒါႇကဲအီဒါ တိုအီးယံင်းကဲနီန်မာ် ဟည်ဂီုန်းမှယ်ဒိုရ်နီန်ယာ့်အောႏ။
“ရဘံန်းနီန် ရာမ်ယိူဝ်းဒေဲႈ အ်ုႈအ်ုႈခ်ုခ်ုပွံတ် အီဒါခံင်မဝ်ကဲနီန်။ ကဲဒါခံင်မဝ်း ကနိုက်စလော့ ပါ်ဆိူမ်။ ဆာ်ကဲဟည်ချှူမ်ဖါ်ႈ အာဝ်မိူဝ်ႈဒါဆေ ကဲဟည်တောပ်ဒေ တိူဝ်ႈပ်ုန်ယိူဝ်းကဲယာ့်။ ခံင်မိုႈဂါင်ယဲမိုႈရီမ်းပြောဒေင် ဘ်ုပ်ဆဒိမှယ်ဒိုရ်အီး။ ဂြိုဆေမာ် အာဝ်ဘိူန်းအူန်း”
ကောန်အီမာည်း ကဝ်အီဂေါည်ပရဝ်လိုင်ကေင်နီန်အူအီး က္လာင်းဒါႈ ကဒါႇတံပ်ဆီုက်ခါင် (KIA) ကဲ ဘိူည်တိုည်း ကဲအီဒါခံင်မဝ်းကာည်း ကဲအီယံင်းခံင်မဝ်းကဲနီန်မာ် ဆာ်အယ်ဒါရိူန်းဟာဝ်းကရောႈ ကဲႎီရ်ပ္လေႈႎီရ်ဘိုးအောႏ။
“အာည်ႇနီန် ခံင်မိုႈ TNLA ကဲ ဂေါည်ခေဲင်ရဝ် ကဲစေတ်မေန်းအူန်း။ အီးမာ် ခံင်မိုႈအီးယော အီးအာဝ်ရာမ်စိရေဲန်။ ကဇေန်နီး ဟည်မှယ်ဒေဲႈ။ ယိူဝ်းအေ့ တံပ်ဆီုက်ခါင်ကဲ တောပ်ဒေတိုည်း။ ဆာ်အယ်ႎီရ်ဒါရိူန်းကရောႈ ကဲႎီရ်ပ္လေႈဘိုး။ ကဒါႇဂီုန်း အီးရာမ်ဒါဒိုႇရိူန်းကရောႈ”
မိူဝ်ႈဘိုးတိုအီးခေဲင်အရာပ်အူအီး က္လာင်းဒါႈ ကဇေန်နီး ဂေါႇမိုႈငျားအချီုင်အီးဟာဝ်း ပမာရ် စီပဲန်မိူဝ်ႈအေ့ တိုအီးခေဲင်အရာပ် ကဲအီကတူႈ KIA ကဲတိုည်းဟာဝ်း ခိင်ဟာဝ်းကဲပမာရ်ဒီန်အောႏ။
“ကဇေန်နီး ခံင်မိုႈချီုင်ရေဲန်မာရ် တိုအီးခေဲင်အရာပ်ကဲမာ် ဟာဝ်းႎီရ်ဂီုန်းဒီးကော်။ ဟောည်ႇဒီန် ဂြူဒါကဲမာ် ကဘြဲႈ။ ဆာ်အီးဒါဖါ်ႈဘည်ဒီန် ကဒါႇ KIA ကဲ ဟည်တိုည်းဟာဝ်း။ အာဝ်မိူဝ်ႈစိ ဘည်စေတ်မေန်းကဲနီန်။ ဆာ်ကဲယိူဝ်းမာ် ကဲတိုည်းဟာဝ်းဘည်ယိူဝ်းကဲ။ ခေဲင်ပ်ုန်တိုည်းဟာဝ်းကဲဒီန် တောပ်စံမ်အီအာဝ်ဒါခံင်မဝ်း။ ထာန်နံပ်အော တောပ်ပည်အီဒါ အီအာဝ်ဒါ ကဲအီကတူႈဒါရိူန်းကရောႈဟာဝ်းနီန် ဂီုန်းခည်း။ ဟည်မိုႈ ဖိုန်ဖံန်အီးယာ့်။ အူအီး ကဲဘ်ုပ်ဒါရိူန်း 1ဆဲန် ရကာဝ်အူကပျာဝ်း ဒေဲႈကရောႈကဲ။ ထာန်နံပ်အောဒီးကော်”
မိူဝ်ႈဘိုးတိုအီးခေဲင်အရာပ်အူအီး က္လာင်းဒါႈ ခည်ကျံရ်ဇူန် ဆငည်း 3 စူန်မှိူဝ်ဒိူန်မာ် KIA ကဲ တိုည်းဟာဝ်းဘိုး ကောန်အီပ်ုန်အူအီးကာည်း ကောန်အီမာည်း ရဝ်ဟင်းမွန်ဂါရ်နီန်အောႏ။
“ကဲတိုည်းဟာဝ်း ကပံတ်စူန်မှိူဝ်။ ကဲဒေဲႈဟြီုက်မေဲန် ကောန်အီပ်ုန်ဒီန်။ ကဲဒါႈ ကဲအာဝ်ယိူဝ်း။ ဂေါႇဘည်ဒီန် စီပဲန်ကဲတိုည်းဟာဝ်းအ်ုန်။ ဆာ်မိုႈကောန်အီမာည်းဒီန် အာဝ်ယိူဝ်းစိအ်ုန်ဒါ။ ကဲတိုည်းဟာဝ်းဘည်ဒီန်။ တာဘြောင်ရဝ် ဟြီုက်အေ့။ ညှံမ်ယိူဝ်းစိ။ ကဒါႇမှောကဲတောႇဟာဝ်းဂါရ်မာ် အာဝ်နံပ်စိ”
တိုအီးခေဲင်အရာပ်ကဲ ဘိူည်ရံပ်ခါမ် ဘည်တိုည်းစေတ်ကဲ၊ ဘည်တိူဝ်ႈလာည်းကဲအရေး တတိုအီးဒါခံင်မဝ်းကဲနီန်မာ် အာဝ်ဆံင်တောစိ ဘည်ဆူည်ႇကဲတအီးဒါရိူန်းဒေဲႈကရောႈ စီပ္လေႈႎီရ်ဘိုး ဘည်နီန်နီးအောႏ။
ဆာ်မိုႈကီုင်းအေဲမ်ကိုက်နီန် တံပ်ကိုးကာင်း MNDAA ကဲ တီုက်လာည်းဘိုး တတံပ်နာန်းတအာင်း TNLA ကဲအီမိုႈ ဖုင်ဘဝ်ကီုက်ဒါင်းနီန် ခည်ကျံရ်မာချှ် ဆငည်း 14ဒိူန် ဟောည်ႇဒီန် ကဲစီဟံပ်ထိင်ခြဲလာ်အ်ုန်ပဲန် ခေဲင်အရာပ် (1) ကဲအောႏ။
ကဝ်အီကပ္လါႇဆဒါင် – Lway N Tra
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
