မာည်းရူပ၊ ကျံရ်အေပ်ြုရ် ဆငည်း 23၊ လာဆေဝ်
တိုအီးကီုင်းလာဆေဝ်ကဲ က္လာင်းတဖုင်ဆျှိုည်ဖီမျေဒါႈ ဒီဘိူန်းတံပ်ကညာအာဏာဆီုက်ဇေဝ်ကဲတထိင်ခြဲ ပကပီုန်ဆျှံမ်ကဒါႇပိူည် ခေဲင်ကီုင်းလာဆေဝ်နီန် ဒါႈဖါ်ႈနံင်ဇိူရ်ႈကား ပျံမ်းဟာဝ်းဖါ်ႈကညာက်ုရ်ရံရ်နီန်စီ ဖါ်ႇဟာဝ်းကားအ်ုန်အောႏ။
ကဲဒါႈ ခည်ကျံရ်အေပ်ြုရ် ဆငည်း 21 ဒိူန် တိုအီးအရာပ်လာဆေဝ် ကညာက်ုရ်ရံရ် ဦးဆန်းအောင် ဘိူန်းအဆာက် 38 ဆန်ုမ်နီန် ကတူႈကောန်အီမာည်း 2 အီး အ်ုန်အီဒါႈနံင်ဇိူရ်ႈကားဂါရ်နီန် ဒါႈဖါ်ႈနံင်ကောႈတိူရ်ႈနီန်စီ တောႇဟာဝ်းဖါ်ႈအ်ုန် ဘံန်ရောတ် ပယေကာန်တောင် ခေဲင်ဇံင် 5 နီန် ပျံမ်းဖါ်ႈအ်ုန်စီတိူဝ်ႈဟာဝ်း ကားအ်ုန်အောႏ။
တိုအီးအရာပ်လာဆေဝ် ကောန်အီမာည်း ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းတဖုင်ဆျှိုည်ဖီမျေဒါႈ”ပယေကာန်တောင်နီန် အီဟိုက်လေႈဂီုန်းအေ့။ ကဲဒါႈနံင်ကောႈတိူရ်ႈကဒါႇဒီန်စီဟာဝ်းလာ်ကဒါႇဒီန်။ ကောန်အီမာည်း ကဝ်အီဒါႈနံင်ယံင်းကားဒီန်မာ် တောႇဟာဝ်းကဲ။ ဘံန်ရောတ်ကဲ ကဒါႇယေကာန်တောင်နီန် ကဲပျံမ်းဖါ်ႇတိုအီးစီ တိူဝ်ႈဟာဝ်းကားဒီန်။ ကဝ်အီကတူႈကဲပျံမ်းဒီန်မိုႈ ႎံရ်ခြိူဝ်းခါင်”။
အ်ုန်ဆီုပ်ဒါႈ တံပ်ကညာအာဏာဆီုက်ဇေဝ်ကဲမာ် ဟည်တောႇဒေတခေါရ်တိုည်းဟာဝ်း ကောန်အီမာည်း အီပျံမ်းဟာဝ်းတိုအီးဂါရ်ဒီန် ကံပ်ရောတ်အဒိူဝ် ကျံရ်အေပ်ြုရ် ဆငည်း 23 နီန်မာ် ညှံမ်ဘိူန်းစိ တိုည်းဟာဝ်းအောႏ။
ဘံန်ထိင်ခြဲဟာဝ်း တံပ်ကညာအာဏာဆီုက်ဇေဝ်ကဲတ ကီုင်းလာဆေဝ်နီန် ဆဲႈဒါႇအမှုစိုန် အမှုပျံမ်းတိုအီး၊ အမှုဘြား၊ အမှုကဖါ်ႇကဲနီန်မာ် ဂေါည်ဂေါည်ပဲန်ဖါ်ႈ ကဒါႇတံပ်ကညာအာဏာဆီုက်ဇေဝ်ကဲမာ် အာဝ်မိူဝ်ႈစိ ဘည်ဘယ်ကဲဒေတိူဝ်ႈလာည်းအရေးအောႏ။
ဆဲႈဒါႇဒီန် တိုအီးအရာပ်ကဲဒါႈဘိုး ကား ကူန်ရဝ်မာဂါင် အ်ုန်အီဂေါည်ခေဲင်ကီုင်းလာဆေဝ်ကဲမာ် ဂေါည်ဂေါည်ကတူႈဖါ်ႈအီဘြား ကဒါႇတံပ်ကညာအာဏာဆီုက်ဇေဝ်ကဲ အာဝ်ဘယ်စိ ဒေတိုည်းဒဲႈတြားခါမ်နီန်အောႏ။
ခည်ကျံရ်ေႎှဲပ်ဘျူရီ ဆငည်း 24 ဒိူန်မာ် ခေဲင်ဇံင်(5) ပကီုင်းလာဆေဝ် ခေဲင်ဆဴင်ကုန်စုင်နီန် ကောန်အီမာည်း 3 အီး လီပ်ဒေဲႈဖါ်ႈခေဲင်ဆဴင်စီ ထာ့်ဆနာတ်တိုည်းဟာဝ်း ကညာဆဴင် ကောန်အီပ်ုန်အ်ုန်အီဘိူန်း အဆာက် 20 ဆန်ုမ်နီန်စီ ဆူည်ႇကဲဒေဲႈရောႈဒါရိူန်းအောႏ။
ကဝ်အီကပ္လါႇဆဒါင် – လိုည်ပိုႈဆပေ
~ ~ ~
ဆဒါင်ဖုင်ယဲဆျှိည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
