ယာရူစိင်၊ ကျံရ်မေ ဆငည်း 31၊ လောက်ကည်
တိုအီးခေဲင်ရမာအ်ုန်ကဲအူအီး က္လာင်းတဆျှိုည်ဖီမျေဒါႈ ကောန်အီပ်ုန်ဒဲႇ ကဝ်အီဟာဝ်းရေဲန်ဇီုင်းကာန် ရဲ့ကောန်ဒဲႇ ပကီုင်းလောက်ကည် အ်ုန်အီမိုႈဒီပ်ုန်ထိင်ခြဲအူန်း တံပ်ကိုးကာင်း – MNDAA ကဲနီန် 1အီး ဟြာည်ကမာ်ႈဟာဝ်းဖါ်ႈ အာဝ်ဘိူန်းယာ့် ကဆီုပ်ကဘားတရမာအ်ုန်ကဲအောႏ။
လိုည်းဆဲင်ႏခေါ်င် အ်ုန်အီဆီုင်ဒါ့်ဘိူန်းလိူည်အဆာက် 15ဆန်ုမ်နီန် အ်ုန်ဂေါည်ဖါ်ႈပလှံင်တာင်ယာန် ခမိုမာန်ကော်င်မှု ရဝ်လော်ည်ပျဲတ် အ်ုန်တောပ်ဟာဝ်းကောန်အီပ်ုန် တိုအီးရဝ်ကဲကဲအူအီး ကနာည်နံင်ဟာဝ်းရေဲန်ဇီုင်းကာန် ပလောက်ကည်နီန် ခည်ဆန်ုမ် 2024 စူန်ဒိုႇကျံရ်ဒိူန်အောႏ။
“အ်ုန်ဟိုက်တောပ် ကောန်အီပ်ုန် တိုအီးရဝ်ယဲအူအီး။ ကောန်အီပ်ုန်ဒီန် အ်ုန်ခံတ်လာည်း တာခယ်ကဒါႇနီန်။ အ်ုန်တောႇဒေဲႈ ကနာည်နံင်ရဲ့ကောန်အ်ုန်ဒီးကော်။ ကောန်အီပ်ုန်ဒီန် အ်ုန်ဒါႈဖါ်ႈ ကောန်အ်ုန်လိုဟိုက်ယုင်ဆနံမ် စီအူန်းႎီုန်လာ် လိုည်းဆဲင်ႏခေါ်င်ဒီန် ဂေါည်တောပ်တာခယ်ကဲ။ ဟောည်ႇဒီန် ကဲဒါႈဘိုးအ်ုန်တိူဝ်ႈရိူန်းကဲ ဒါႈဘိုးကဲယိူဝ်းအ်ုန် ပဆဴင်ဟောမ်တျံင်အူလှေ။ ဘံန်ဟာဝ်းတိူရ်ႈယဲ ကဲစီဒါႈ အာဝ်မိုႈစိကဲယိူဝ်း။ မိုႈကဲကအာ်မ်းကလူည်ႇတိုအီး”
ကဇေန်နီး ဂေါႇမိုႈအာဝ်ယိူဝ်းဟံမ်းဟိူဝ်ႇ ဆဒါင်လိုည်းဆဲင်ႏခေါ်င်ဒီန် စီပဲန်နံင်အာဝ်မိုႈစိ အ်ုန်ကလူည်ႇဒါဒေင် ဟြာည်ကမာ်ႈဟာဝ်း နံင်မိုႈအ်ုန်ကတူႈအီးယံင်းဟောမ်အ်ုန်ယာ့်။
အ်ုန်က္လာင်းအူန်းဒါႈ ကောန်အီပ်ုန် ကဝ်အီတောႇဟာဝ်း လိုည်းဆဲင်ႏခေါ်င်ဒီန်မာ် အ်ုန်အာဝ်တိူဝ်ႈဒဲႈစိအရေး တောပ်အီကဆီုဝ်ကဆဲင် ဘည်ဟြာည်ကမာ်ႈဟာဝ်း အ်ုန်ဒီန်အောႏ။
ကဒါႇကုင်ခယ် အ်ုန်အီကစံပ်တောပ် လောက်ကည်နီန် ဂေါည်ဂေါည်မိူဝ်ႈဖါ်ႈ အီတိူဝ်ႈလာည်းဒါရိူန်း ခံတ်လာည်းတာခယ်ကဲ လိုည်းဆဲင်ႏခေါ်င်ဒီန်မာ် နံင်ဆမာကတူႈအူန်းဖေး ယံင်းဟောမ်ဒီန်အောႏ။
ဂေါႇမိုႈရမာအ်ုန်ကဲ နောႈမှည် စီပဲန်ကဲမှာန်းပ်ုန်ကဇောည်ဒါႈ ဆာ်မိူဝ်ႈအီးယိူဝ်း မှာန်းပဲကဆီုပ်ဒေဲႈ တဖုင်ယဲဆျှိုည်ဖီမျေနီန်အောႏ။
ကဇေန်နီး တိုအီးဂေါည်ဂေါည်ဟြာည်ကမာ်ႈဖါ်ႈ ပကပီုန်ဆျှံမ်ကဒါႇပိူည် ဂေါႇမိုႈအမှုဘြား၊ အမှုစိုန်၊ အမှုရံပ်တိုည်းလာည်းရိူန်းကဲနီန် ဂေါည်ဂေါည်ပဲန်ဒေဲႈ စီပဲန်ကဆီုဝ်တိုအီးခေဲင်အရာပ်ကဲမာ် လိုခည်းဟာဝ်းဆဒိ ႎီရ်ဆဒိအောႏ။
ကဝ်အီကပ္လါႇဘေဲႇဆဒါင် – Lway N Tra
~ ~ ~
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်ကဲနီန်အောႏ။
