ရွှေဖီမြေ၊ ဧပြီ ၃ ရက်
“ဝ” တပ်မတော် – UWSA က လူသတ်မှု ကျူးလွန်သူ နောက်ထပ်အမျိုးသားတစ်ဦးကို လူမြင်ကွင်းရှေ့မှာ သေဒဏ်ချမှတ်ပြီး သေဆုံးသူရဲ့ ရုပ်အလောင်းကို ဖျောက်ဖျက်ရာမှာ ကူညီပေးတဲ့ ရည်းစားဖြစ်သူ အမျိုးသမီးကိုတော့ ထောင်ဒဏ်ချမှတ်ခဲ့တယ်လို့ “ဝ” ပြည်တရားစီရင်ရေးကော်မတီ – WSP က ထုတ်ပြန်ခဲ့ပါတယ်။
တရားစီရင်မှုကို မနေ့ ဧပြီ ၂ ရက်က မိုင်းပေါက်မြို့မှာ စီရင်ခဲ့တာဖြစ်ပြီး သေဒဏ်ချမှတ်ခံရသူကတော့ အသက် ၂၄ နှစ်အရွယ် လီနီလူဆိုသူဖြစ်ပါတယ်။
ထောင်ဒဏ်ချမှတ်ခံရတဲ့ သူ့ရဲ့ ရည်းစားဆိုသူ အမျိုးသမီးကတော့ ဘောင်အိုးထွန်းဆိုသူဖြစ်ပြီး ၆ နှစ်တိတိ ထောင်ဒဏ်ချမှတ်ခံရတာဖြစ်တယ်လို့ ဆိုပါတယ်။
လီနီလူက ပြီးခဲ့တဲ့ ဖေဖော်ဝါရီလ ၄ ရက် မနက်ခင်းမှာ သူ့ရဲ့ မိတ်ဆွေဖြစ်တဲ့ စန်းမီကို “မျက်နှာသစ်ပြီး သေနတ်တစ်ချက် စမ်းပစ်ကြမယ်” လို့ဆိုကာ လူမရှိတဲ့ တောထဲကို ခေါ်သွားပြီး စန်းမီသတိမထားမိတဲ့အချိန်မှာ လီနီလူက သူ့နောက်ကျောကို သေနတ် ၃ ချက်နဲ့ ပစ်သတ်ခဲ့တယ်လို့ ဖော်ပြထားပါတယ်။
ပစ်သတ်ပြီးနောက် လီနီလူက စန်းမီရဲ့ ကားနဲ့ ကားထဲမှာရှိတဲ့ တရုတ်ယွမ်ငွေ ၂ သောင်း (ကျပ် ၁၂၈ သိန်း) တို့ကို ယူပြီး စန်းမီရဲ့ ရုပ်အလောင်းကို လယ်တောထဲ ပစ်ထားကာ ဘောင်အိုးထွန်းကလည်း စကားပြောမှတ်တမ်းဖျက်ဖို့၊ သွေးစွန်းနေတဲ့ အဝတ်အစားတွေကို ဖျက်ဖို့ ပါဝင်ကူညီလှုံ့ဆော်ပေးခဲ့တယ်လို့ ထုတ်ပြန်ချက်မှာ ထည့်သွင်းဖော်ပြခဲ့ပါတယ်။
ဒါကြောင့် လီနီလူကို တရားမဝင် လက်နက်ကိုင်ဆောင်မှု၊ ရည်ရွယ်ချက်ရှိရှိ လူသတ်မှု၊ လုယက်မှု၊ မူးယစ်ဆေးဝါး သုံးစွဲမှု စတဲ့အမှုတွေကို ပေါင်းစည်းပြီး သေဒဏ်ချမှတ်ကာ ၎င်းရဲ့ အခွင့်အရေးတွေကို တစ်သက်တာလုံး ပယ်ဖျက်ကြောင်း ဆုံးဖြတ်ခဲ့တယ်လို့ ဆိုပါတယ်။
ဒီလို သေဒဏ်ပေးတဲ့စနစ်ဟာ လူ့အခွင့်အရေး စံချိန်စံနှုန်းနဲ့ ကိုက်ညီမှု မရှိဘူးလို့ လူ့အခွင့်အရေး လှုပ်ရှားသူတွေက ပြောဆိုနေကြပေမဲ့ UWSA ဟာ “ဥပဒေက သနားညှာတာမှုမရှိ” ဆိုတဲ့ ဆောင်းပုဒ်နဲ့ ရာဇဝတ်သားတွေကို လူမြင်ကွင်းရှေ့မှာ သေဒဏ်မကြာခဏပေးလေ့ရှိပြီး ပြီးခဲ့တဲ့ မတ်လ ၂၉ ရက်မှာလည်း အကျဉ်းထောင် လုံခြုံရေးဝန်ထမ်းတစ်ဦးကို သတ်ဖြတ်ပြီး ထောင်ပြေးတဲ့ ရာဇဝတ်သား ၄ ဦးကို သေဒဏ်ပေးခဲ့ပါသေးတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
