သုတ၊ ဧပြီ ၃ ရက်၊ မိုးကုတ်
မန္တလေးတိုင်း မိုးကုတ်မြို့နယ်အခြေစိုက် တော်လှန်ရေးတပ်ဖြစ်တဲ့ (Red Wolves of Mogok) အဖွဲ့ဟာ မိုးကုတ်မြို့နယ်ထဲကနေ ဆုတ်ခွာသွားပြီလို့ ပြီးခဲ့တဲ့ ဧပြီလ ၁ ရက်မှာ ထုတ်ပြန်ထားပါတယ်။
မိုးကုတ်-မိုးမိတ် စစ်ဦးစီးချုပ်ရဲ့ အမိန့်နဲ့ မိုးကုတ်မြို့နယ်ကနေ ပြီးခဲ့တဲ့ မတ်လ ၂၁ ရက်မှာ ဆုတ်ခွာသွားတာဖြစ်ပြီး လက်ရှိမှာ မိုးကုတ်မြို့နဲ့ အနီးဆုံးနေရာတွေမှာ စစ်အင်အားတွေ ဖြည့်တင်းထားပြီး လူထုတွေအနေနဲ့ လက်မလျော့ဖို့ အသိပေးလိုကြောင်း ဖော်ပြထားပါတယ်။
စစ်ကောင်စီရဲ့ တန်ပြန်ထိုးစစ်ဆင်မှုနဲ့ တော်လှန်ရေးတပ်တွေဘက်က လက်နက်ခဲယမ်း လိုအပ်ချက်တွေကြောင့် မိုးကုတ်မြို့နယ်ကနေ တော်လှန်ရေးတပ်တွေ အားလုံးလည်း ဆုတ်ခွာသွားပြီလို့ မိုးကုတ်အခြေစိုက် တော်လှန်ရေးတပ်ဖွဲ့ဝင်တစ်ဦးက ပြောပါတယ်။
“မိုးကုတ်ကနေ အကုန်ဆုတ်ပြီ။ အဓိကတော့ မိုးမိတ်ဘက်ခြမ်း လမ်းလည်းပွင့်ပြီဆိုတော့ စစ်ရေးအရ ပိတ်မိသွားမှာ စိုးလို့ ဆုတ်လိုက်တာ ဖြစ်တယ်” လို့ ဆိုပါတယ်။
မိုးကုတ်မြို့နယ်မှာ မိုးကုတ်ဗျူဟာ၊ Red Wolves of Mogok၊ မိုးကုတ် ပကဖနဲ့ TRI ဗျူဟာအပြင် တခြား တော်လှန်ရေးတပ်တွေ အခြေစိုက်ထားပြီး စစ်ကောင်စီရဲ့ ထိုးစစ်ကို ခုခံတိုက်ခိုက်နေကြတာလည်း ဖြစ်ပါတယ်။
တရုတ်နိုင်ငံရဲ့ ကြားဝင်စေ့စပ်မှုနဲ့ ပြီးခဲ့တဲ့ နိုဝင်ဘာလကုန်မှာ တအာင်းတပ်မတော် – PSLF/TNLA ထိန်းချုပ်ထားတဲ့ မိုးကုတ်နဲ့ မိုးမိတ်မြို့တွေထဲကို စစ်ကောင်စီတပ်က ပြန်လည် ထိန်းချုပ်ခွင့်ရခဲ့တာ ဖြစ်ပါတယ်။
မိုးကုတ်နဲ့ မိုးမိတ်ကို ဝင်ရောက်လာတဲ့ စစ်ကောင်စီတပ်ကို အမျိုးသားညီညွတ်ရေးအစိုးရ – NUG ရဲ့ ကာကွယ်ရေးဝန်ကြီးဌာနအပါအဝင် တော်လှန်ရေးတပ်တွေဘက်က တိုက်ခိုက်မှုတွေ ပြုလုပ်ခဲ့ပေမယ့် ၄ လကျော်ကြာလာချိန်မှာ ပြန်လည် ဆုတ်ခွာခဲ့ရတာလည်း ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
