ရွှေဖီမြေ၊ ဧပြီ ၃ ရက်
စစ်ကောင်စီ ကျင်းပတဲ့ ရွေးကောက်ပွဲကနေ ထွက်ပေါ်လာတဲ့ ပြည်ထောင်စုလွှတ်တော်ကနေ ရွေးချယ်တင်မြှောက်ပြီး သမ္မတဖြစ်လာတဲ့ အာဏာသိမ်း စစ်ခေါင်းဆောင် ဦးမင်းအောင်လှိုင်ကို ဂုဏ်ပြုကြောင်း “ဝ” တပ်ဖွဲ့ – UWSA က ဒီနေ့ ဧပြီ ၃ ရက်မှာ ထုတ်ပြန်ပါတယ်။
စစ်ခေါင်းဆောင်ဟာ တပ်ချုပ်တာဝန် ထမ်းဆောင်စဉ် နိုင်ငံတည်ငြိမ်အေးချမ်းရေးကို ဆောင်ရွက်နိုင်ခဲ့ပြီး လူမှုစီးပွားတိုးတက်အောင် ဆောင်ရွက်နိုင်ခဲ့ကာ အောင်မြင်မှုတွေ ရရှိခဲ့တယ်လို့လည်း ဆိုပါတယ်။
သမ္မတဖြစ်လာတဲ့ ဦးမင်းအောင်လှိုင်ရဲ့ ဦးဆောင်မှုအောက်မှာ နိုင်ငံတည်ငြိမ်အေးချမ်းမှု၊ ဖွံ့ဖြိုးတိုးတက်မှုနဲ့ တိုင်းရင်းသား စည်းလုံးညီညွတ်မှုတွေကို ဆောင်ရွက်နိုင်မယ်လို့ ယုံကြည်ကြောင်း ထုတ်ပြန်ချက်ထဲ ဖော်ပြထားပါတယ်။
“ဝ” ပြည်နယ်ဟာ မြန်မာနိုင်ငံရဲ့ ခွဲထွက်မရတဲ့ အစိတ်အပိုင်းဖြစ်ပြီး နိုင်ငံကနေ ခွဲထွက်တာ၊ သီးခြားလွတ်လပ်ရေးကို ကြေညာမှာ မဟုတ်ကြောင်းလည်း UWSA က ဆိုပါတယ်။
ဒီနေ့ ဧပြီ ၃ ရက်မှာ စစ်ကောင်စီရဲ့ ပြည်ထောင်စုလွှတ်တော်ကနေ သမ္မတရွေးချယ်ရေး ပြုလုပ်ခဲ့ပြီး စစ်ခေါင်းဆောင် ဦးမင်းအောင်လှိုင်က သမ္မတ၊ ဗိုလ်ချုပ်ကြီးဟောင်း ဦးညိုစောက ဒုသမ္မတ (၁) နဲ့ ကြံခိုင်ရေးပါတီ – USDP ရဲ့ လွှတ်တော်ကိုယ်စားလှယ် ဒေါ်နန်းနီနီအေးက ဒုသမ္မတ (၂) ဖြစ်လာတာပါတယ်။
၂၀၂၀ ရွေးကောက်ပွဲကို မဲသမာမှုရှိတယ်ဆိုတဲ့ စွပ်စွဲချက်နဲ့ အာဏာသိမ်းခဲ့တဲ့ စစ်ခေါင်းဆောင် မင်းအောင်လှိုင်ဟာ ၅ နှစ်အကြာမှာ ၎င်းရဲ့ စိတ်ကြိုက်လုပ်ဆောင်ခဲ့တဲ့ ရွေးကောက်ပွဲကနေ သမ္မတဖြစ်လာခဲ့တာလည်း ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
