ရွှေဖီမြေ၊ ဧပြီ ၂၄ ရက်
မြောက်ပိုင်းတပ်ဖွဲ့တွေဖြစ်တဲ့ “ဝ” တပ် – UWSA ၊မိုင်းလားတပ် – NDAA၊ ကချင်တပ် – KIA၊ တအာင်းတပ် – TNLA ၊ ကိုးကန့်တပ် – MNDAA တို့ ထိန်းချုပ်ထားတဲ့ မြို့နယ်တွေကို သမ္မတရာထူး ရယူထားတဲ့ ဦးမင်းအောင်လှိုင်အစိုးရက စစ်အုပ်ချုပ်ရေး ကြေညာလိုက်ပါတယ်။
၁၀၂၇ စစ်ဆင်ရေးအတွင်း တိုက်ခိုက်သိမ်းပိုက်ထားပြီး UWSA ထံ ညီနောင်မဟာမိတ်တွေ လက်လွှဲလိုက်တဲ့ ဟိုပန်မြို့နယ်၊ အမျိုးသားဒီမိုကရက်တစ် မဟာမိတ်တပ်မတော် – NDAA ထိန်းချုပ်ထားတဲ့ မိုင်းလားမြို့နယ်နှင့် ၁၀၂၇ စစ်ဆင်ရေးအတွင်း KIA သိမ်းပိုက်ထားတဲ့ မဘိမ်းမြို့နယ်တို့ စစ်အုပ်ချုပ်ရေး ကြေညာခံရတဲ့ မြို့နယ်ထဲ ပါဝင်ကြပါတယ်။
ဒါ့အပြင် TNLA ထိန်းချုပ်ထားဆဲဖြစ်တဲ့ နမ့်ဆန်၊ မန်တုံ၊ နမ္မတူနဲ့ နမ့်ခမ်းမြို့နယ်တွေလည်း စစ်အုပ်ချုပ်ရေးမြို့နယ်စာရင်းထဲပါဝင်ပြီး MNDAA လက်ရှိထိန်းချုပ်ထားတဲ့ သိန္နီ၊ ကွတ်ခိုင်၊ ကွမ်းလုံ၊ လောက်ကိုင်နဲ့ ကုန်ကြမ်းတို့လည်းပါဝင်ပါတယ်။
အဲထဲမှာ TNLA ထံ စစ်ကောင်စီပြန်လည်သိမ်းပိုက်ခဲ့တဲ့ ကျောက်မဲ၊ သီပေါနဲ့ မိုးမိတ်မြို့နယ်တို့လည်းပါဝင်တာ တွေ့ရပြီး အခုလို မင်းအောင်လှိုင် စစ်အုပ်ချုပ်ရေးကြေညာခြင်းရဲ့ ရည်ရွယ်ချက်ကတော့ လက်နက်ကိုင်သောင်းကျန်းမှုတွေချုပ်ငြိမ်းစေဖို့ဆိုပြီး ထုတ်ပြန်ကြေညာချက်မှာ ဖော်ပြထားပါတယ်။
စစ်အုပ်ချုပ်ရေးကြေညာခံရတဲ့မြို့နယ်တွေအကုန်လုံးကတော့ ပြည်နယ် ၆ ခုထဲက မြို့နယ် ၄၁ မြို့နယ်နဲ့ တိုင်းဒေသကြီး ၃ ခုထဲက ၁၄ မြို့နယ် စုစုပေါင်း ၅၅ မြို့နယ်တိတိနဲ့ ရက်ပေါင်း ၉၀ တိတိ ကြာမြင့်မှာ ဖြစ်တယ်ဆိုပါတယ်။
ဒီလို ထုတ်ပြန်ကြေညာချက်မတိုင်ခင် တရုတ်အပြင် UWSA ၊ NDAA နဲ့ TNLA တို့က ဦးမင်းအောင်လှိုင်အစိုးရကို ဂုဏ်ပြုသဝဏ်လွှာ အသီးသီး ပေးပို့ခဲ့ကြပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
