ရွှေဖီမြေ၊ ဇူလိုင် ၂၃ရက်
စစ်ကောင်စီရဲ့ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC)နဲ့ ပလောင်ပြည်နယ်လွတ်မြောက်ရေးတပ်ဦး – PSLF/TNLA တို့ နေပြည်တော်မှာ ဆွေးနွေးထားတဲ့ အချက်တွေ ပေါက်ကြားလာပါတယ်။
ဆွေးနွေးပွဲကို ပြီးခဲ့တဲ့ ဇူလိုင် ၁၉ ရက်မှာ နေပြည်တော် ရွှေစံအိမ်ဟိုတယ်မှာ နှစ်ဖက်ကိုယ်စားလှယ်တွေ တွေ့ဆုံခဲ့ပြီး TNLA ဘက်က ၎င်းတို့ရဲ့ ရည်မှန်းချက်ဖြစ်တဲ့ တအာင်းပြည်နယ်ရရှိရေးအတွက် ဆွေးနွေးခဲ့တယ်လို့ ဖော်ပြထားပါတယ်။
ဒါ့အပြင် TNLA အနေနဲ့ နိုင်ငံကနေ ခွဲထွက်မှာမဟုတ်ဘဲ အသိအမှတ်ပြုမှုကို ရရှိရင် မိုင်းလားတပ် – NDAA နဲ့ “ဝ” တပ်ဖွဲ့ – UWSA တို့နဲ့အတူ စစ်ကောင်စီရဲ့ ငြိမ်းချမ်းရေးလုပ်ငန်းစဉ်တွေမှာ တက်တက်ကြွကြွ ပါဝင်မယ်လို့ ဆိုထားပါတယ်။
တရုတ်နိုင်ငံမှာ နှစ်ဖက်တပ်အကြား ရရှိထားတဲ့ ဟိုင်ဂင်သဘောတူညီချက်ကို လေးစားလိုက်နာပြီး တရုတ် – မြန်မာနယ်စပ် တည်ငြိမ်မှုကနေ မြန်မာတစ်နိုင်ငံလုံး အေးချမ်းဖို့ အရေးပါတယ်လို့ ဖော်ပြထားပါတယ်။
TNLA ဘက်က လူထုဘဝ သက်သာချောင်ချိရေးကိစ္စကိုလည်း ဆွေးနွေးခဲ့ပြီး ရှမ်းမြောက် သီပေါနဲ့ နမ္မတူမြို့နယ်ကြားရှိ မိုးတေတံတား ပြန်ပြင်ဖို့အပါအဝင် တအာင်းဒေသ ဖွံ့ဖြိုးရေးအတွက် စစ်ကောင်စီဘက်က သဘောထားကြီးဖို့ လိုအပ်တယ်လို့ ဆိုပါတယ်။
စစ်ကောင်စီတပ်ဘက်ကတော့ နမ့်ဆန်နဲ့ မန်တုံကို ပလောင်ကိုယ်ပိုင်အုပ်ချုပ်ခွင့်ရဒေသအဖြစ် သတ်မှတ်ထားပြီးဖြစ်တာကြောင့် ပြည်နယ်ရဖို့ လွှတ်တော်ကနေ ဆောင်ရွက်ရမယ်လို့ စစ်ကောင်စီဘက်က တုံ့ပြန်ထားပါတယ်။
ဒါ့အပြင် တအာင်းဒေသက ပညာရေးနဲ့ပတ်သက်ပြီး တရားဝင်ကျောင်းဖြစ်ဖို့ စစ်ကောင်စီရဲ့ ပညာရေးဝန်ကြီးဌာနက သတ်မှတ်ထားတဲ့ သင်ရိုးညွှန်းတမ်းအတိုင်း သင်ကြားရင် အဆင်ပြေနိုင်မယ်လို့ ပြန်လည်ဆွေးနွေးပါတယ်။
တရုတ်နိုင်ငံရဲ့ ကြားဝင်မှုကြောင့် စစ်ကောင်စီနဲ့ တအာင်းတပ်အကြား ပြီးခဲ့တဲ့ ၂၀၂၅ ခုနှစ် အောက်တိုဘာလထဲမှာ အပစ်ရပ်ထားပြီးနောက် ၁ နှစ်နီးပါးအကြာမှာ နေပြည်တော်မှာ ဆွေးနွေးမှု ဖြစ်ပေါ်လာတာ ဖြစ်ပါတယ်။
နှစ်ဖက်တွေနောက်တစ်ကြိမ်ပြန်တွေ့မယ့်နေရာကို တအာင်းဒေသ နမ့်ဆန်မြို့မှာ စစ်ကောင်စီဘက်က အဆိုပြုထားပြီး TNLA ဘက်က ဗဟိုကော်မတီနဲ့ ပြန်လည်ညှိနှိုင်းမယ်လို့ ဖော်ပြထားပါတယ်။
စစ်ကောင်စီတပ်ဘက်ကတော့ နှစ်ဖက်တပ်အကြား ဆွေးနွေးမှုတွေကို ထုတ်ပြန်ထားပေမယ့် TNLA ဘက်ကတော့ ဒီနေ့ ဇူလိုင် ၂၁ ရက်အထိ တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
PSLF/TNLA ဟာ ၁၀၂၇ စစ်ဆင်ရေးအတွင်း မြို့ပေါင်း ၁၂ ခုကို ထိန်းချုပ်ထားနိုင်ခဲ့ပြီး မြို့နယ် ၆ ခုကို ပြန်လက်လွှတ်ခဲ့ရကာ လက်ရှိမှာ နမ္မတူ၊ မန်တုံ၊ နမ့်ဆန်၊ နမ့်ခမ်း၊ မိုင်းငေါ့နဲ့ မိုင်းလုံမြို့တွေကိုသာ ထိန်းချုပ်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
