ရွှေဖီမြေ၊ မေလ ၂၁ ရက်၊ လွိုင်တိုင်းလျန်း
နယ်မြေနဲ့ အကျိုးစီးပွားတွေအတွက် တော်လှန်ရေးတပ်အချင်းချင်းကြား တိုက်ခိုက်မှုတွေဟာတော်လှန်ရေးကို ကြာရှည်စေတယ်လို့ သျှမ်းပြည်ပြန်လည်ထူထောင်ရေးကောင်စီ- RCSS ရဲ့ ဥက္ကဋ္ဌ ဗိုလ်ချုပ်ကြီး ယွက်စစ်က ပြောပါတယ်။
ဒီနေ့ မေလ ၂၁ ရက်မှာ ကျရောက်တဲ့ ၆၈ နှစ်မြောက် ရှမ်းပြည်တော်လှန်ရေးနေ့ မိန့်ခွန်းမှာ ဗိုလ်ချုပ်ကြီး ယွက်စစ်က အခုလို ထည့်သွင်းပြောကြားခဲ့တာပဲ ဖြစ်ပါတယ်။
တော်လှန်ရေးအဖွဲ့အစည်းတွေဟာ ဗမာပြည်သူ့စစ်အသွင် တပ်မုန်းတီးရေးနဲ့သာ တိုက်ပွဲဝင်တာ၊ ရေရှည်ရည်မှန်းချက် မရှိတာကြောင့် ရန်သူဘက်က နိုင်ငံရေး ကစားလာတဲ့အခါ လက်နက်ချသွားတာနဲ့ ပြောင်းလဲသွားတာတွေ ရှိနေတယ်လို့ ဆိုပါတယ်။
ဒါ့အပြင် တော်လှန်ရေးအဖွဲ့အစည်းတချို့ဟာ ငွေနဲ့ အာဏာ တည်ဆောက်ပြီး မာနထောင်လွှားကာ တောထဲမှာ မင်းမူနေတယ်လို့ ဗိုလ်ချုပ်ကြီး ယွက်စစ်က ထည့်သွင်းပြောကြားခဲ့ပါတယ်။
အမှားတွေကို သင်ခန်းစာယူပြီး တော်လှန်ရေးအဖွဲ့အစည်းအကြား အပြစ်မတင်ကြဘဲ နိုင်ငံရေး၊ စစ်ရေးဗျူဟာတွေကို လေ့လာသင်ယူဖို့ လိုအပ်တယ်လို့ ဆိုပါတယ်။
RCSS ဟာ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ်- NCA မှာ လက်မှတ်ရေးထိုးတဲ့ တိုင်းရင်းသားလက်နက်ကိုင်တပ်ဖြစ်ပြီး စစ်တပ် အာဏာသိမ်းပြီးနောက်ပိုင်းမှာလည်း နိုင်ငံရေးပြဿနာကို နိုင်ငံရေးနည်းလမ်းနဲ့သာ ဖြေရှင်းသွားမယ်လို့ မကြာခဏ ထုတ်ပြောထားတဲ့ အဖွဲ့အစည်းဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
