မိုင်းပန်ပျော်၊ မတ်လ ၃၀ ရက်၊ ပန်ဆန်း
“ဝ”ဒေသ ပန်ဆန်းမြို့မှာ ထောင်စောင့်ရဲတစ်ဦးကို သတ်ပြီး ထောင်ဖောက်ပြေးခဲ့တဲ့ အကျဉ်းသား ၈ ဦးထဲက ၄ ဦးကို သေဒဏ်စီရင်ခဲ့ပြီး ကျန် ၄ ဦးကိုတော့ ထောင်ဒဏ် ချမှတ်ခဲ့တယ်လို့ ဝပြည်သွေးစည်းညီညွတ်ရေး တပ်မတော်- UWSA က ထုတ်ပြန်ပါတယ်။
ဖြစ်စဉ်ဟာ ပြီးခဲ့တဲ့ ဇန်နဝါရီ ၂ ရက်မှာ ဖြစ်ပွားခဲ့တာဖြစ်ပြီး အဆိုပါအမျိုးသား ၈ ဦးဟာ နမ့်တစ် ထောင်ကနေ ထောင်ဖောက်ပြီး ထွက်ပြေးသွားချိန်မှာ ထောင်စောင့်ရဲတစ်ဦးကို သတ်ဖြတ်ခဲ့တယ်လို့ ဆိုပါတယ်။
နောက်ပိုင်းမှာတော့ အဲဒီအကျဉ်းသားတွေကို ပြန်လည်ဖမ်းဆီးနိုင်ခဲ့ပြီး ဖမ်းမိသူတွေထဲက ၄ ဦးကို သေဒဏ် ချမှတ်ခဲ့ပြီး ကျန်တဲ့ ၄ ဦးကို ထောင်ဒဏ် နှစ်ရှည် နှစ်တို ချမှတ်ခဲ့တယ်လို့ ဖြစ်စဉ်သိရှိသူ အမျိုးသမီးတစ်ဦးက ရွှေဖီမြေကို ပြောပါတယ်။
“ဟုတ်တယ် သေဒဏ်ပေးတာ ပန်ဆန်းမှာ။ တလောက နမ့်တစ်ထောင်မှာ ထောင်ဖောက်ပြေးသွားတဲ့ ၈ ယောက်က ထောင်စောင့်ရဲကိုသတ်ပြီး ထွက်ပြေးသွားတာ။ အခုမှ ပြန်ဖမ်းမိပြီး သေဒဏ်ပေးတာ”
ထောင်ဖောက်ပြီး ထွက်ပြေးသွားချိန်မှာ အကျဉ်းသားတွေက ထောင်စောင့်ရဲတစ်ဦးရဲ့ ကားနဲ့ သေနတ်ကို လုယူပြီး ထွက်ပြေးသွားခဲ့တယ်လို့ ဆိုပါတယ်။
ထွက်ပြေးတဲ့အချိန်မှာ မြစ်ကိုကူးပြီး လွတ်မြောက်ဖို့ ကြိုးစားခဲ့သလို သက်သေ ဖျောက်ဖို့အတွက် သေနတ်ကို ရေထဲ ပစ်ချခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ဒီအမှုနဲ့ ပတ်သက်ပြီး စုစုပေါင်း လူ ၈ ဦးကို တရားစီရင်ခဲ့ရာ အဓိက ပါဝင်သူ ၄ ဦးကို သေဒဏ် ချမှတ်ခဲ့ပြီး ကျန် ၄ ဦးထဲက ၂ ဦးကို ထောင်ဒဏ် တစ်သက်တစ်ကျွန်း၊ ကျန် ၂ ဦးကိုတော့ ထောင်ဒဏ် ၁၅ နှစ်နဲ့ ၄ နှစ် ချမှတ်ခဲ့တယ်လို့ သိရပါတယ်။
“ဝ”ဒေသမှာ လူသတ်မှုလို ပြင်းထန်တဲ့ ရာဇဝတ်မှု၊ မူးယစ်ဆေးဝါး အကြီးစား ကုန်ကူးမှု၊ လုံခြုံရေးတပ်ဖွဲ့ဝင်တွေကို တိုက်ခိုက်တဲ့အမှုတွေ ဖြစ်လာရင် သေဒဏ်အပါအဝင် ပြင်းထန်တဲ့ အရေးယူမှုတွေ ချမှတ်လေ့ ရှိပါတယ်။
ပြီးခဲ့တဲ့ ဖေဖော်ဝါရီ ၆ ရက်မှာလည်း UWSA ထိန်းချုပ်ထားတဲ့ မိုင်းပေါက်မြို့မှာ ဓားပြတိုက်ပြီး လူသေစေတဲ့အထိ ကျူးလွန်ခဲ့တဲ့ အမျိုးသား ၃ ဦးကို သေဒဏ် စီရင်ခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
