ရွှေဖီမြေ၊ ဧပြီ ၂၄ ရက်
စစ်ကောင်စီရဲ့ လက်အောက်ခံ ဝါဒဖြန့်ချီရေးယန္တရားဖြစ်တဲ့ ပြန်ကြားရေးဝန်ကြီးဌာနက ပြီးခဲ့တဲ့ ဧပြီ ၂၂ ရက်မှာ ချင်းပြည်တွင်းသတင်းဌာနတွေဖြစ်ကြတဲ့ မျက်မှောက်ခေတ် (Nowaday News) ၊ Chin World နဲ့ Khonuthung Media တို့ကို လိုင်စင်ပိတ်သိမ်းလိုက်တယ်လို့ ထုတ်ပြန်ခဲ့ပါတယ်။
ဒီလို သတင်းအေဂျင်စီလုပ်ငန်း အသိအမှတ်ပြုမှု လိုင်စင်ရုတ်သိမ်းတာနဲ့ပက်သက်ပြီး “မျက်မှောက်ခေတ်” သတင်းဌာနရဲ့ အယ်သီတာအဖွဲ့က စစ်ကောင်စီအနေနဲ့ သတင်းမီဒီယာလွတ်လပ်ခွင့်ကို ပိတ်ပင်တားဆီးလို့ရမှာ မဟုတ်ကြောင်း အချက် ၄ ချက်ပါတဲ့ သကဘောထားတုံ့ပြန်ချက် ထုတ်ပြန်ခဲ့ပါတယ်။
အာဏာသိမ်းစစ်ကောင်စီတပ်ရဲ့ ယခုပိတ်သိမ်းကြောင်း ထုတ်ပြန်ချက်ဟာ တရားဝင်မှုမရှိသလို “မျက်မှောက်ခေတ်” အနေနဲ့လည်း အဲဒီထုတ်ပြန်ချက်အပေါ် အလေးထား ဂရုပြုနေမှာ မဟုတ်ဘဲ ပြည်သူလူထု သိသင့်သိထိုက်တဲ့ အမှန်တရားတွေ၊ မြေပြင်သတင်းတွေကို ဘယ်လိုအတားအဆီးရှိရှိ နည်းလမ်းမျိုးစုံနဲ့ ဆက်လက်သတင်းထုတ်လွှင့် တင်ဆက်သွားမှာဖြစ်တယ်လို့ ဆိုထားပါတယ်။
မိမိတို့ (မျက်မှောက်ခေတ်) သတင်းဌာနဟာ ဘယ်လိုဖိအားအောက်မှာပဲဖြစ်ဖြစ် ပြည်သူ့ဘက်ကနေ ရပ်တည်ပြီး သတင်းမီဒီယာကျင့်ဝတ်နဲ့အညီ အမှန်တရားကို ဖော်ထုတ်သွားမယ်ဖြစ်ကြောင်း ထပ်လောင်းပြောဆိုခဲ့ပါတယ်လို့ ဆိုထားပါတယ်။
စစ်ကောင်စီဟာ ယခင်တုန်းကလည်း ရှမ်းမြောက်အခြေစိုက် ရွှေဖီမြေသတင်းအေဂျင်စီအပါအဝင် ပြည်တွင်းသတင်းဌာနအများစုရဲ့ သတင်းထုတ်လုပ်ခွင့် လိုင်စင်တွေကို ပိတ်သိမ်းခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
