မိုင်းရူပ၊ ဧပြီ ၉ ရက်၊ လားရှိုး
စစ်ကောင်စီတပ် ထိန်းချုပ်ထားတဲ့ ရှမ်းမြောက် လားရှိုးမြို့မှာ ဆိုင်ကယ်အရောင်းအဝယ် လုပ်နေတဲ့ လူငယ်နှစ်ဦးကို သူခိုးလို့ စွပ်စွဲပြီး စစ်ကောင်စီရဲ့ လက်အောက်ခံရဲက သတိလစ်တဲ့အထိ ရိုက်နှက်ခဲ့တယ်လို့ ရွှေဖီမြေက စုံစမ်းသိရှိရပါတယ်။
မနေ့ ဧပြီ ၈ ရက် ညနေပိုင်းမှာ လားရှိုးမြို့ ရပ်ကွက်(၇)မှာ ဆိုင်ကယ်အရောင်းအဝယ်လုပ်နေတဲ့ အသက် ၂၀ ကျော်အရွယ် လူငယ်အမျိုးသားနှစ်ဦးကို လားရှိုး အမှတ်(၁) ရဲစခန်းက လာရောက်ဖမ်းဆီးခဲ့တာဖြစ်ပြီး တစ်ညလုံး ရိုက်နှက်ခဲ့တယ်လို့ ဖြစ်စဉ်ကိုသိရှိသူ လားရှိုးမြို့ခံအမျိုးသားတစ်ဦးက ရွှေဖီမြေကို ပြောပါတယ်။
“သူခိုးက သူတို့ဆိုင်မှာ ဆိုင်ကယ် လာရောင်းတာ။ သူခိုးမှန်း မသိဘူးလေ။ ဝယ်လိုက်တော့ ရဲတွေ လိုက်လာတာ။ တစ်ယောက်ဆို တစ်ညလုံး ရိုက်ခံရတာ။ နောက်ကျောက ညိုမဲနေတာပဲ။ သတိပါ လစ်သွားတာ”
ဒီနေ့ ဧပြီ ၉ ရက် မနက်ပိုင်းမှာတော့ ဆိုင်ကယ်သူခိုးကို စစ်ကောင်စီရဲ့ ရဲတပ်ဖွဲ့ဝင်က ဖမ်းဆီးရမိခဲ့တာကြောင့် အဲဒီလူငယ်နှစ်ဦးကို ပြန်လွှတ်ပေးလိုက်ပြီလို့ ၎င်းက ဆက်ပြောပြပါတယ်။
စစ်ကောင်စီရဲ့ ရဲတပ်ဖွဲ့ဝင် ရိုက်နှက်တဲ့ဒဏ်ရာကြောင့် သူခိုးလို့ စွပ်စွဲခံရတဲ့ လူငယ် ၂ ဦးဟာ ဆေးကုသမှု ခံယူနေရတယ်လို့ ဆိုပါတယ်။
လားရှိုးမြို့ကို စစ်ကောင်စီတပ် ပြန်ထိန်းချုပ်ပြီးနောက် မူးယစ်ဆေးဝါး သုံးစွဲသူတွေ ပိုများလာတဲ့အပြင် ခိုးမှု၊ ဓားပြ၊ လုယက်မှုတွေ မကြာခဏ ဖြစ်ပွားနေတယ်လို့ မြို့ခံတွေက ရွှေဖီမြေကို ပြောဆိုထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
