ရွှေဖီမြေ၊ ဧပြီ ၂ ရက်၊ ပြင်ဦးလွင်
မန္တလေးတိုင်း ပြင်ဦးလွင်မြို့ရှောင်လမ်းမှာ သေနတ်ဒဏ်ရာ၊ ဓါးဒဏ်ရာနဲ့ သေဆုံးပြီး ပုတ်ပွနေတဲ့ အလောင်း ၂ လောင်းကို တွေ့ခဲ့ပေမယ့် သက်ဆိုင်ရာက သတင်းဖုံးထားကြောင်း ကိုယ်တိုင်မြင်ခဲ့ရသူ ဒေသခံအမျိုးသားတစ်ဦးရဲ့ ပြောပြချက်အရ သိရပါတယ်။
အဲအလောင်းတွေကို ပြင်ဦးလွင်မြို့ရှောင်လမ်း ဖောင်းတောရွာအနီးမှာ ခရီးသွားတွေက ပြီးခဲ့တဲ့ မတ်လ ၃၁ ရက်မှာ တွေ့ခဲ့ကြတာဖြစ်ပြီး သက်ဆိုင်ရာနဲ့ ရွာခံတွေကို အကြောင်းကြားခဲ့ပေမဲ့ စစ်ကောင်စီနဲ့ သက်ဆိုင်ရာတွေက သတင်းမထွက်ဖို့ပဲ ပြောကြားခဲ့ကြောင်း ဆိုပါတယ်။
ဒေသခံအမျိုးသားက “အလောင်းက လမ်းဘေးမှာဘဲ တွေ့တာ။ လူငယ်ပိုင်း အမျိုးသမီးဘဲ။ အလောင်းနဲ့အတူ ဖုန်းနဲ့ လက်ဝတ်ရတနာတွေလည်း တွေ့ထားတယ်။ စစ်တပ်နဲ့ လူမှုကူညီရေးကားတွေ လာကောက်သွားတယ်” လို့ ပြောပါတယ်။
သေဆုံးသူတွေဟာ အသက် ၂၀ ကျော်အရွယ်တွေသာဖြစ်ပြီး တစ်ဦးကတော့ ဦးခေါင်းနဲ့ ကျောပြင်မှာ ဓါးဒဏ်ရာနဲ့ သေဆုံးနေပြီး ကျန်တစ်ဦးကတော့ နားထင်နဲ့ ဝမ်းဗိုက်မှာ သေနတ်နဲ့ပစ်ခံခဲ့ရတဲ့ ဒဏ်ရာနဲ့ တွေ့ခဲ့ရကြောင်း အထက်ပါအမျိုးသားက ဆိုပါတယ်။
သေဆုံးသွားတဲ့ အဲဒီအမျိုးသမီးတွေရဲ့ နေရပ်လိပ်စာကိုလည်း မသိရတဲ့အပြင် နိုင်ငံတော် ထိပ်ပိုင်းခေါင်းဆောင်တွေ အပြောင်းအလဲလုပ်ချိန်မှာ သတင်းမထွက်စေချင်တာကြောင့် လူမှုကွန်ယက်ပေါ် မတင်ဖို့ စစ်ကောင်စီတပ်က ဒေသခံနဲ့ မျက်မြင်သက်သေတွေကို ပြောဆိုထားတယ်လို့ ဆိုပါတယ်။
အလားတူ စစ်ကောင်စီတပ်ရဲ့ လုံခြုံရေးတင်းကြပ်ထားတဲ့ ပြင်ဦးလွင်မှာ ၂၀၂၅ ခုနှစ် နှစ်ဆန်းမှာလည်း ပြင်ဦးလွင်မြို့အထွက်က စစ်ကောင်စီတပ်ရဲ့ စစ်ဆေးရေးဂိတ်အနီးမှာ ဓါးဒဏ်ရာနဲ့ သေဆုံးနေတဲ့ အမျိုးသားရုပ်အလောင်းတစ်လောင်းကို တွေ့ခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
