ရွှေဖီမြေ၊ ဧပြီလ ၂၇ ရက်
စစ်ကောင်စီနဲ့ ပူးပေါင်းသွားတဲ့ တပ်ဖွဲ့ဝင် ၃၅ ဦးကို အမည်ပျက်စာရင်း ကြေညာကြောင်း ပြည်သူ့ကာကွယ်ရေးတပ်မတော် TRI ဗျူဟာက ဒီနေ့ ဧပြီ ၂၇ ရက်မှာ ကြေညာချက် ထုတ်ပြန်ပါတယ်။
အမည်ပျက်စာရင်း ကြေညာခံရသူတွေထဲမှာ အမျိုးသား ၂၇ ဦး အမျိုးသမီး ၈ ဦးပါဝင်ပြီး ၎င်းတို့တွေဟာ ရှေ့တန်းစစ်မျက်နှာပြင်မှာ စခန်းစွန့်ခွာတာ၊ တပ်ပိုင်ပစ္စည်းခိုးယူတာ၊ ငွေကြေးအလွှဲသုံးစားပြုလုပ်တာ စတဲ့ ပြစ်မှုတွေ ကျူးလွန်ခဲ့သူတွေဖြစ်တယ်လို့ ဆိုပါတယ်။
ဒါ့အပြင် စစ်ကောင်စီထံ လက်နက်ချအညံ့ခံတာ၊ လေကြောင်းတိုက်ခိုက်မှုဖို့ စစ်ကောင်စီကို နေရာပေးတာ၊ တခြားရဲဘော်တွေကို လက်နက်ချဖို့ စည်းရုံးတာတွေ ပြုလုပ်ခဲ့တယ်လို့ ထုတ်ပြန်ချက်ထဲ ဖော်ပြထားပါတယ်။
ဒါကြောင့် ၎င်းတို့ ၃၅ ဦးကို တပ်ပြေးနဲ့ တော်လှန်ရေး သစ္စာဖောက်အဖြစ် သတ်မှတ်ပြီး အမည်ပျက်စာရင်းကြေညာကြောင်း TRI ဗျူဟာက ဆိုပါတယ်။
TRI ဗျူဟာတပ်ဟာ မန္တလေးတိုင်း မိုးကုတ်၊ သပိတ်ကျင်းမြို့နယ်တွေမှာ အခြေစိုက်ပြီး စစ်ကောင်စီကို တော်လှန်တိုက်ခိုက်နေတဲ့ တော်လှန်ရေးတပ်ဖြစ်ပါတယ်။
စစ်ကောင်စီတပ်ဟာ တော်လှန်ရေးတပ်ဖွဲ့တွေကို လက်နက်ချအလင်းဝင်ဖို့ မကြာခဏ စည်းရုံးတာတွေပြုလုပ်နေပြီး ဧပြီ ၂၄ ရက်မှာလည်း တအာင်းတပ် TNLA၊ အာရက္ခတပ်တော်- AA အပါအဝင် ပြည်သူ့ကာကွယ်ရေးတပ် PDF တပ်ဖွဲ့ဝင် ၅၀၀ ကျော် အလင်းလာတယ်လို့ စစ်ကောင်စီက ဝါဒဖြန့် ထုတ်ပြန်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
