လွေးဇွန်မိုး၊ ဧပြီ ၁ ရက်၊ ကွတ်ခိုင်
ရှမ်းမြောက် ကွတ်ခိုင်မြို့နယ် မိုင်းယုလေးကျေးရွာအုပ်စု ဟိုခိုကျေးရွာရဲ့ ရွာအဝင်ဆိုင်းဘုတ်လည်း လာရောက်ဖျက်ဆီးခံသွားရတယ်လို့ ဒေသခံတွေက ရွှေဖီမြေကို ပြောပါတယ်။
ပြီးခဲ့တဲ့ မတ်လ ၂၈ ရက်မှာ ဟိုခိုရွာအဝင်ဆိုင်းဘုတ်မှာ ရေးထားတဲ့ တအာင်းစာတွေကို ကိုးကန့်ဝတ်ဆုံ ဝတ်ဆင်ထားတဲ့တပ်ဖွဲ့ဝင်တွေက လာရောက်ဖျက်ဆီးသွားခဲ့တာဖြစ်တယ်လို့ ဒေသခံ အမျိုးသားတစ်ဦးက ပြောပါတယ်။
“မိုင်းယုလမ်းခွဲကော ဟိုခိုအထက်ကော အောက်မှာကော အကုန်ဖျက်ပစ်လိုက်ပြီ။ ဆိုင်းဘုတ်မှာ တအာင်းစာပါလို့ထင်တယ်။ အဲကြောင့်ဖျက်ပစ်တာ။ ဒေသခံတွေလည်း ကြောက်တော့ ဘာမှသွားမပြောရဘူးလေ”
အလားတူ ကွတ်ခိုင်မြို့နယ်က တအာင်းကျေးရွာတွေကို ကိုးကန့်တပ်က အစည်းအဝေးခေါ်ပြီး တအာင်းကျေးရွာက စာသင်ကျောင်းတွေမှာ တအာင်းအလံမထောင်ဖို့ နဲ့ ရွာအဝင်ဆိုင်းဘုတ်တွေကို တအာင်းအလံပုံစံဆေးမချယ်ဖို့ပြောခဲ့တယ်လို့ အစည်းအဝေးတက်ရောက်ခဲ့တဲ့ ဒေသခံတွေက ပြောပါတယ်။
အစည်းအဝေးပြီးနောက်မှာလည်း ကွတ်ခိုင်မြို့နယ်ထဲက တအာင်းကျေးရွာတချို့ရဲ့ ရွာအဝင်ဆိုင်းဘုတ်မှာ ချယ်ထားတဲ့ တအာင်းအလံပုံစံတွေကို ကိုးကန့်တပ်က လာဖျက်ဆီးသွားတာရှိတယ်လို့ ဒေသခံတွေက ပြောကြပါတယ်။
ပြီးခဲ့တဲ့ မတ်လ ၂၂ ရက်နဲ့ ၂၃ ရက်မှာ ကိုးကန့်တပ်က ကွတ်ခိုင်မြို့နယ်အတွင်းရှိ ကျေးရွာတွေမှာ လူထုတွေ့ဆုံပွဲ ပြုလုပ်ခဲ့ပြီး ငြိမ်းချမ်းစွာ ဖွံ့ဖြိုးတိုးတက်ရေးနဲ့ အမျိုးသားကိုယ်ပိုင်ပြဌာန်းခွင့် လမ်းစဉ်ကို ဆက်လက်ကိုင်စွဲသွားမှာဖြစ်ပြီး တိုင်းရင်းသားအားလုံးကို ခွဲခြားဆက်ဆံမှာမဟုတ်ပဲ တန်းတူညီမျှရေးကို အလေးထားသွားမယ်လို့ ပြောကြားခဲ့ကြောင်း ထုတ်ပြန်ထားပေမယ့် မြေပြင်မှာတော့ ကွဲလွဲမှုရှိနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
