ရွှေဖီမြေ၊ ဧပြီ ၂၀ ရက်၊ တာချီလိတ်
၄ လ ဝန်းကျင်အထိ စစ်ကောင်စီတပ်ရဲ့ ဖမ်းဆီးခြင်းကို ခံထားရတဲ့ ကျောက်မဲမြို့နယ်မှ အမျိုးသမီး ၁ ဦး ပြန်လွှတ်လာပြီး စစ်ကောင်စီတပ်ကို သိန်း ၇၀ ကျော် ပေးခဲ့ရကြောင်း မိသားစုဝင်တွေနဲ့ နီးစပ်သူတွေက ပြောပါတယ်။
ပြီးခဲ့တဲ့ ဇန်နဝါရီ ၂၈ ရက် ည ၈ နာရီ ဝန်းကျင်က တာချီလိတ်မြို့သို့ အလုပ်လုပ်ဖို့သွားတဲ့ ကျောက်မဲ၊ မိုင်းရယ်နဲ့ တန့်ယန်းက အမျိုးသမီး ၃ ဦးကို တာချီလိတ်မြို့ ညဈေးတန်းအနီးမှာ ဖမ်းဆီးခဲ့တာ ဖြစ်ပါတယ်။
“သူဖမ်းခံနေရတဲ့အတောအတွင်း လုံးဝ အဆက်အသွယ်မရဘူး။ ဟိုနေ့ မှ ဖုန်းဆက်လာပြီး ပိုက်ဆံ ၈၀ လိုတယ်ပြောလာတာ။ မရှိနိုင်ဘူး အဲလောက်က များတယ် ညှိရင်းနဲ့ ၇၀ ပေးလိုက်မှ လွှတ်လာတာ” လို့ ပြောပါတယ်။
ဧပြီလ ၁၆ ရက် ညမှ စစ်ကောင်စီတပ်ဟာ မိသားဝင်တွေကို ဖုန်းဆက်ခိုင်းပြီး ငွေ သိန်း ၇၀ နဲ့ ပြန်ရွေးခိုင်းဖို့ အတင်းအဓမ္မ ဖိအားပေး ခြိမ်းခြောက်ခံခဲ့ရကြောင်း အထက်ပါ အမျိုးသားက ဆိုပါတယ်။
”စဖမ်းကတည်းက ပိုက်ဆံပေးရင် ပြန်လွှတ်ပေးမယ်ပြောတယ်။ ဒါပေမဲ့ သူက မပြောလာရဲဘူး” လို့ အထက်ပါအမျိုးသားက ထပ်ပြောပါတယ်။
ဖမ်းစီးခံထားရချိန်မှာ မကြာခဏ ရိုက်နှက်နှိပ်စက်ခံနေရတာရှိသလို စစ်မှုထမ်းဖို့လည်း မကြာခဏ ပြောဆိုတာလည်းရှိကြောင်း သူကဆိုပါတယ်။
ဒါ့အပြင် သူမနဲ့အတူ ဖမ်းဆီးခံထားရတဲ့ အမျိုးသမီး ၂ ဦးကိုလည်း စစ်ကောင်စီတပ်က ငွေပေးဖို့ အတင်းဖိအားပေး ပြောဆိုနေပြီး မပေးနိုင်ပါက ဧပြီလကုန်ရင် စစ်မှုထမ်းခိုင်းဖို့ ပြောထားကြောင်း ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
