ရွှေဖီမြေ၊ မတ်လ ၁၂ ရက်၊ ကျောက်မဲ
ရှမ်းမြောက် ကျောက်မဲမြို့နယ်ထဲ ရှမ်းပြည်တိုးတက်ရေးပါတီ- SSPP လှုပ်ရှားနယ်မြေဖြစ်တဲ့ ပုံဝိုးရွာအနီးမှာ SSPP နဲ့ စစ်ကောင်စီတပ် တိုက်ပွဲ ဖြစ်ပွားခဲ့ပြီး စစ်ကောင်စီတပ်ဘက်က ရွာခံအမျိုးသားတချို့ကို ဖမ်းဆီးခေါ်ဆောင်သွားတယ်လို့ SSPP က သတင်းထုတ်ပြန်ပါတယ်။
စစ်ကောင်စီ လက်အောက်ခံ ခြေမြန်တပ်ရင်း (ခမရ ၅၀၆)က တိုက်ပွဲ ဖြစ်တဲ့နေ့ မတ်လ ၁၀ ရက် ညနေပိုင်း ၅ နာရီ ၄၅ မိနစ်ခန့်မှာ ရွာခံတွေကို ဖမ်းဆီးခေါ်ဆောင်သွားတယ်လို့ ဆိုပါတယ်။
အဲဒီရွာခံတွေကို ဖမ်းဆီးပြီး နောက်ကျောကို ဓားနဲ့လှီးဖြတ်ကာ စစ်ဆေးတာ ရှိတယ်လို့ SSPP က ဒေသခံရဲ့ပြောဆိုချက်ကို ကိုးကားပြီး ဖော်ပြထားပေမဲ့ ဖမ်းဆီးခံရသူရဲ့ နာမည်စာရင်းတွေကို ဖော်ပြထားခြင်း မရှိပါဘူး။
Hsan Loi Voice ဆိုတဲ့ Facebook စာမျက်နှာမှာ ဖော်ပြချက်အရ လက်ရှိအချိန်ထိ ဖမ်းဆီးခံရသူ ၄ ဦးရှိပြီး ၎င်းတို့ဟာ အသက် ၂၂ နှစ်အရွယ် စိုင်းမော့၊ ၂၅ နှစ်အရွယ် စိုင်းမိန်းဟန်၊ ၄၄ နှစ်အရွယ် လုံထွန်းဟန်နဲ့ ၂၄ နှစ်အရွယ် စိုင်းထွန်းတို့ဖြစ်တယ်လို့ ဖော်ပြထားပါတယ်။
ရှမ်းပြည်အခြေစိုက် သျှမ်းသံတော်ဆင့် သတင်းဌာနကတော့ ဖမ်းဆီးခံရသူ ၁၀ ဦးအထိ ရှိခဲ့ပြီး ၅ ဦး ပြန်လွတ်မြောက်ကာ ၅ ဦးကို စစ်တပ်က ဆပ်လက် ဖမ်းဆီးထားတယ်လို့ ဒေသခံတစ်ဦးကို ကိုးကားပြီး သတင်းဖော်ပြထားပါတယ်။
ရွှေဖီမြေအနေနဲ့ ဖမ်းဆီးခံရသူတွေရဲ့စာရင်းနဲ့ အသေးစိတ် အချက်အလက်ကို ရရှိနိုင်ဖို့ ဒေသခံတွေကို ကြိုးစားဆက်သွယ်နေဆဲ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
