ရွှေဖီမြေ၊ ဧပြီ ၂၉ ရက်၊ နမ့်ဆန်
တအာင်းတပ်-TNLA ထိန်းချုပ်ထားတဲ့ နမ့်ဆန်မြို့နယ် ဇယ်တုန်ဟုန်းအုပ်စု၊ လပိုင်းကျေးရွာမှာ လေပြင်းတိုက်ခတ်မှုကြောင့် လူနေအိမ် ၁၀ လုံးပျက်စီးသွားခဲ့တယ်လို့ TNLA က ဒီနေ့ ဧပြီ ၂၉ ရက်မှာ ထုတ်ပြန်ထားပါတယ်။
ပြီးခဲ့တဲ့ ဧပြီ ၂၅ ရက် နေ့လယ် ၂ နာရီကျော်မှာ မိုးသည်ထန်စွာရွာသွန်းပြီး လေပြင်းတိုက်ခတ်ခဲ့တာကြောင့် လပိုင်းကျေးရွာက နေအိမ်တွေ အမိုးလန်တာ၊ နံရံပြိုကျတာနဲ့ နေအိမ်ထဲကပစ္စည်းတွေ ပျက်စီးသွားတာတွေရှိတယ်လို့ ဖော်ပြထားပါတယ်။
“တော်တော်တိုက်တယ် အဲနေ့။ သူများအိမ်တော့မသိဘူး။ ကိုယ်တို့အိမ်တောင် သွပ်မိုးတွေလှုပ်တယ်” လို့ဒေသခံ အမျိုးသမီးတစ်ဦးက ပြောပါတယ်။
ပျက်စီးသွားတဲ့ နေအိမ် ၁၀ အိမ်ထဲက ၂ အိမ်ဟာ လေပြင်းတိုက်ခတ်မှုဒဏ်ကြောင့် လုံးဝပျက်စီးသွားခဲ့ပြီး အဲဒီလေပြင်းတိုက်ခတ်မှုကြောင့် စုစုပေါင်း ကျပ်သိန်း ၁၀၀ ကျော် ဆုံးရှုံးသွားခဲ့တယ်လို့ ဆိုပါတယ်။
ပြီးခဲ့တဲ့ ဧပြီ ၂၇ ရက် ည ၇ နာရီ ဝန်းကျင်မှာလည်း လေပြင်းတိုက်ခတ်မှုကြောင့် တာချီလိတ်မြို့နယ် ပုန်းထွန် ရပ်ကွက်၊ နမ္မလင်းရွာ၊ ဆွတ်ဆိုင်ရွာ၊ အမှတ် ၁ ချစ်ကြည်ရေးတံတားအနီး၊ ပါလျှံ (၂) ဝေဠုဝန်ကျောင်းလမ်း စတဲ့နေရာတွေမှာ သစ်ပင်လှဲတာနဲ့ သစ်ကိုင်းကျိုးကျတာတွေကြောင့် လူနေအိမ်တွေရဲ့ အမိုးအကာတွေ ပျက်စီးခဲ့တာလို့ ဒေသခံတွေက ပြောပါတယ်။
ဒါ့အပြင် ပြီးခဲ့တဲ့ ဧပြီ ၁၈ ရက်ကလည်း လေပြင်းတိုက်ခတ်ခဲ့တာကြောင့် မြို့တွင်းရှိ နေအိမ်နဲ့ အများသုံး အဆောက်အဦးအပြင် စေတီပုထိုးတွေလည်း ပျက်စီးခဲ့ပါတယ်။
အလားတူ ရှမ်းအရှေ့ ကျိုင်းတုံ၊ မိုင်းဖြတ်နဲ့ မိုင်းဆတ်မြို့မှာလည်း လေပြင်းတိုက်ခတ်ခဲ့တာကြောင့် နေအိမ်တွေ ပျက်စီးတာတွေရှိခဲ့ပါတယ်။
ဒါကြောင့် ပြည်သူလူထုတွေအနေနဲ့ သဘာဝဘေးအန္တရာယ်တွေကို ကြိုတင်ကာကွယ်နိုင်ဖို့ မြေပြိုနိုင်တဲ့ နေရာတွေ၊ လေပြင်းကြောင့် သစ်ပင်ကျိုးကျ၊ လဲကျနိုင်သောနေရာတွေနဲ့ အန္တရာယ်ရှိနိုင်တဲ့ ဒေသတွေကို ကြိုတင်စစ်ဆေးပြီး လိုအပ်တဲ့ ရှင်းလင်းရေးလုပ်ငန်းတွေကို စနစ်တကျ ဆောင်ရွက်ဖို့ TNLA က တိုက်တွန်းထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
