ရွှေဖီမြေ၊ ဧပြီ ၃၀ ရက်၊ မြိုင်
မကွေးတိုင်း မြိုင်မြို့နယ်အရှေ့ဘက်က စစ်ကောင်စီတပ်ရဲ့ အထိုင်ချဂိတ်တစ်ခုကို တော်လှန်ရေး ပူးပေါင်းတပ်တွေက တိုက်ခိုက်သိမ်းပိုက်နိုင်ခဲ့ပြီး လက်နက်ခဲယမ်းတချို့လည်း သိမ်းဆည်းရရှိခဲ့တယ်လို့ အညာမြေ တပ်ပေါင်းစုက ထုတ်ပြန်ထားပါတယ်။
ပြီးခဲ့တဲ့ ဧပြီ ၂၆ ရက်မှာ မြိုင်မြို့နယ် ကန်နီရွာအနီးကို တော်လှန်ရေးတပ်တွေနဲ့ စစ်ကောင်စီတပ်တို့အကြား တိုက်ပွဲဖြစ်ခဲ့သလို ပြီးခဲ့တဲ့ ဧပြီ ၂၈ ရက်မှာလည်း အဆိုပါရွာအနီးမှာ ထပ်မံ တိုက်ပွဲဖြစ်ပွားခဲ့တယ်လို့ ဆိုပါတယ်။
အညာမြေ တပ်ပေါင်းစုရဲ့ ပြန်ကြားရေးတာဝန်ခံ ကိုဘိုဘိုသန့်ဇင်က “ထိခိုက်သေဆုံးတာတွေတော့ မရှိဘူး။ အဲဒီစခန်းကနေ စစ်တပ်ဘက်က ဆုတ်ခွာသွားကြတယ်။ ရန်သူရဲ့ ကင်းထောက်ဒရုန်းတစ်စီးလည်း ကျနော်တို့ ရရှိခဲ့တယ်” လို့ ပြောပါတယ်။
အလားတူ မနေ့ ဧပြီလ ၂၉ ရက်မှာလည်း အညာမြေတပ်ပေါင်းစု၊ ပခုက္ကူခရိုင် အမှတ် (၂၊၆၊၇) တပ်ရင်းတွေအပါအဝင် မကွေးပြည်သူ့ကာကွယ်ရေးတပ်တော် (MGY-PDF) နဲ့ မြိုင်ပ.က.ဖ တို့က စစ်ကောင်စီတပ်ရဲ့ တပ်စခန်းကို ပူးပေါင်းတိုက်ခိုက်ခဲ့တာဖြစ်ပြီး စစ်ကောင်စီတပ်ရဲ့ အထိုင်စခန်းတွေနဲ့ ဂိတ်စခန်းတွေကိုလည်း ဆက်လက်တိုက်ခိုက်သွားမယ်လို့ ဆိုပါတယ်။
အဲဒီဂိတ်စခန်းကနေ လက်ပစ်ဗုံးနှစ်လုံး၊ G3 ကျည် ၁၁၅ တောင့်ပါ ကျည်ဘောက် နှစ်ခုနဲ့ စစ်အသုံးအဆောင်ပစ္စည်းတွေကိုလည်း သိမ်းဆည်းနိုင်ခဲ့ပြီး ဂိတ်စခန်းကို အထိအခိုက်မရှိ သိမ်းပိုက်နိုင်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ပြီးခဲ့တဲ့ ဇန်နဝါရီလ တစ်လအတွင်း စစ်ကောင်စီတပ်နဲ့ တော်လှန်ရေးတပ်တို့အကြား ထိတွေ့ဖြစ်ပွားခဲ့တဲ့ တိုက်ပွဲအတွင်းမှာ တော်လှန်ရေး ရဲဘော် ၄ ဦး ကျဆုံးခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
